ثوار 25 يناير 2012) - شعر/ناصر فرغلي
.............................
مجروح يا صوتي في فضا الميدان
والليل أخير أجْوَف مالوش عمدان
حتى الغُنا زيّ الجسد همْدان
فاتتْ سَنَهْ واحلامنا لسه بعاد
وَنَسِي كلام فَضِّةْ قمر طُوبة
والغِنْوة ساعة رمل مقلوبة
واتْسَرْسِبِتْ مَفْضِلْشِ سرْسوبة
والفجر ناوي يخلف الميعاد
والاّ يكون الفجر حايشينُه
عن النهارده واللي عايشينه
خُفّاش مِضَلِّمْ بين نياشينُه
واقف لنا وواقف له بالمرصاد
وأديني بين الصبح والليلة
منفي وِشايلْني على الشيلة
واشِدّ حيلي الواحد الحِيلة
وأنْقِسِم ملايين بنات وِوْلاد
مقسوم ما بين الحلم وعنيا
وعَ الجِناب عسكر وحرامية
قدّامنا نار من خَلْفِنا مَيّا
ولا مرْكِبه، ولا طارق بن زياد
مقسوم ما بين مِتْعاش وبين مكتوب
والحلم ليه مولود ماهوش مرغوب؟
يا بيوت إزاز بتحدّفي بالطوب
أغلى العزاز وفلذة الأكباد
متسنّدين على بعض صوتي وانا
حرْف الرصيف بيْلِمّ ويْشُقِّنا
مُتَفرجين فوق عَ الحياة تحتنا
مِنداسة في الشارع بجَزْمِةْ حِيادْ
مين عَ الحياد لمّا الدِّما سايله
لمّا الندا قوموا اعدلوا المايله
لمّا الشعوب تِفْنَى عشان دَوْلَه
تِفْضَلْ إرَمْ ولاّ ثمود أو عادْ
مين ع الحياد لمّا الحياةْ فْ كَفَّه
وفْ كَفَّه ساعة مْأخّرَة وْواقفه
مانْعة علينا نمسك الدّفَّه
حابسانا في لَقْطة فْ شريط مِتْعاد
مين عَ الحياد لمّا يشوف ابنُه
نَخْل انْفَرَدْ طُولُهْ وساب حُضْنُه
لَجْلِ العصايَة تْشِدُّه مِنْ وِدْنُه
وِتْرَجّعُه لعادلْ زمان وسُعَادْ
مين ع الحياد لو الحياد تختار
ما بين بيادة وبين غُنا الاشجار
ما بين قصيدة وبين هلاوس زار
تِسْتعبد الأحرار عشان الاسياد
مين ع الحياد لو الحياد موقِف
يا تكون روبوت مربوط وبتسقف
وِ دودة عايشة وَدُودة وبتزحف
يا تكون شهيد على رؤوس الاشهاد
مين عَ الحياد بس بحياده انْحاز
بالصمت للضلمة وأفتى جواز
روما وفؤادة تنحرق بالجاز
وِنيرونْ وعتريس سلطنة وإنشاد
مين ع الحياد مستنّي مين نهّاز
طول عمْره جاهز يتّصل بِجهاز
صفقة وغنيمة أو حِمَى وملاذ
أو برلمان ينفع حصان طُرْوادْ
ومين قعد والكرسي كان هزّاز
ساعه بيان ساعه كلام ألغازْ
ويوم هَوا واسْبُوع قنابل غاز
شهرين هَنَا وباقي السنة فِ حِداد
ومين رِكِب عَ المُهْر لمّا فاز
ولَسْوَعُه بالخُطْبة والمهماز
وإيد معاك والتانية في القُفّاز
جَزَرَة هِنا وِهْناكْ صُباع وِزْناد
وانا كمان مِ اللحظة دي ح انحاز
وافرز واشوف الناس على الفَرّاز
ناس الحقيقة وناس كده كمَجاز
بيشبهونا بس ف الأجساد
مُنْحاز لدمّ بيحرقه التلفاز
لميتين أنبوبة البوتاجاز
للوارِثين مِ النيل عطش ورذاذ
للمولودين في كل يوم ميلاد
مُنحاز لوردة تجرح الفولاذ
لخطوة تِتحدّى مصير عُكّاز
للقِمْري مش للبازْ ولا بِنْ بازْ
ولا سُنَنْ وطبايِع استبداد
مُنحاز لصورة تكسر البرْواز
ورِيح تِزِيح خرزانة الأستاذ
ولحْن ممكن يبقى حَبَّه نشاز
ورَقَمْ طَليق ما يحبسوش عَدّادْ
مُنحاز لروحي الواقفة في البوغاز
ومْحَمِّلة شِعْر وغُنا وارْجاز
وحبّهالْ وخَيَال مِن الممتاز
وغْلالْ تِفيض عن مخزنِكْ يا بْلاد
ده كإني يوسف وانتو إخواني
وازّاي يا دمّي تبقى خَوَّانِي
بعضي ياكلني، وفين؟ على خْوَانِي
ويْلَبّس الشمس اللي فيّا سواد
طَفُّوا عَليّا الضيْ في الحفلة
المحبوسين في الماضي والغفله
ماهو فيه إيدين عاليَة وإيدين سافلة
وإيدين تِقِيدْ وإيدين عمَى بتنْقادْ
كإن انا الحلاج بلا طواسين
مطلوب اشوف سموات فَرَح عابسين
مصلوب عشان فقها وعسّاسين
مَشَفُوشْ حروف روحي ركُوعْ سُجَّادْ
وكإنك انتي بهية في الخمسين
بيِّن تجاعيدها رجوع ياسين
زيّ الربيع متداري في الخماسين
وانتي خريفكِ دَبّل الأعواد
وكإنّ ليلى انتي وانا المَمْحون
بيكي أبوح يِحْرَمْ عليّا أكون
وانتي اللي حَرّم واللي قال مجنون
وانتي اللي قام بينْنا جبل تَوْباد
وكإنك أمي وامّ للدنيا
وكل دُولا عيالك التانية؟!
ما احناش أكيد شققا ولا ثانية
ولا بيننا إلا ما صَنع حَدّاد
بيقولوا عن دمّي اللي ساح مسخره
حبّة حاجات فوضى ومتبعْتَرَه
طيب: أنا شيبوب.. مانيش عنتره
وامّي البلد دي وابويا مش شدّاد
لكن صراطي مستقيم مسطره
لا عندي دم ازرق ولا مَبْخَره
ولا ورثت الخوف وأكل الخرا
ولا هاممني السجن والجلاد
سيبوني اعدّي وازرعوها دُرَا
واتداروا فيه على القهاوي ورا
أشرف لي اكون وسط المظاهرة مَرَا
من اني اكون شنبات على الآيباد
أنا قلت لأه وكَفّي في المَجْمَرَه
قطرة أمل ف غمامة متعسّره
تِطرح شجر ولو ف جوف مقبره
وطيور حريقَه تتولد ف رماد
أنا قلت لأ أنا لسه مش مَرْضِي
صلاتي ثورة وثورتي فَرْضي
وسكوتي عَوْرَة وسُترتي رفْضي
ولو ح اموت ما ح امُوتْش كالمعتاد
أنا قلت لأه ومش ح اسيب أرضي
يِبَرْطَع السمسار مع الرّفَضي
فيها وْيبيعوا وِيشتروا ف عرضي
لا بلطجي ولا فِلّ ولا قَوّاد
أنا قلت لأه وفي الصدور غُصّة
فَصْل انتهى، وْباقي الفصول لسه
ومستمرة الثورة والقصة
يقع ولد فيهْ بْداله سرب جراد
أنا قلت لأّه وهي آخْر السهام
آخر نَفَسْ شايلُه فِ ريشُه الحَمَام
آخر شعاع نوّرْ عيون الكلام
آخر كلام رافض يخش مزاد
قولي لكل ولادِك الصامتة
عندِكْ عِيال تانية ماهيش ساكتة
تعرف تموت تعرف تقول نكتة
تعرف تجيب الثورة مِ الاستاد
قولي لروحِك إحنا مش ضالّين
مِتْوَصّيَة ارْواحنا بْوصايا الطين
مش محتاجين بابا وراسبوتين
ولا مرشدين من مكتب الإرشاد
قولي لْمماليك البلد ديّه
إنّ النهار أغلى مِن الديّة
ولُهْ عُروش وجيوش وجندية
دولا اللي هُمّا خِيرة الأجناد
قولي لْسلاطينِك يا سلطانة
إن الميدان له حاشية وبطانة
وقبيلة ماسكة ف ديلّه شبطانة
وماتبيعوش زيّ امّا باع عَوّاد
قولي لحُرّاسِكْ يا محروسة
النور كمان لُهْ سنان ولُه سُوسَة
والشمس جوّا القلب مدسوسة
ليها ولاد ليها زُهور عَبَّاد
