هتوحشنى
............ وهاقول لك إيه
............ قصايدى كلها وياك
.................... هتوحشنى
وهتوحشنى الحكاوى معاك
وضحكة مصر لما تطل من جواك على التحرير
وطير الصبح لمّا بيخدعك ويطير
وقلبك وانت بتناوش كلاب الغير
وروحك وانت بتناور ملاك الموت من البناوير
ويتقاوح عشان الجمله والتسعير حدادى القوت
يا عاشق مصر بالتفصيل، وراسم روحها بالنبوت
ماكنتش جاهز أكتب لك قصيدة موت
هنستناك فى نفس معادنا ع القهوه
.......................هنستنى وأكيد هتفوت
هنستناك وعارفينك
......................... معادك سكره مظبوط
ماكنتش جاهز أكتب لك قصيدة موت ما تسمعهاش
ماكنتش جاهز أكتب لك قصيده يذلّها الأوباش
ماكنتش جاهز أكتب لك قصيده ف أوضة الإنعاش
برغم إن انت أول قلب يضحك للوشوش ببلاش
وأول روح تعيش دنيا وما تحسبهاش
وأول صوت تكون الدمعه فى عيونه وما يكتمهاش
وأول وش ما اتحلاش فى عين الدون
وأول حد كان مفتون بحب الناس
وداعًا أيها الفارس
هنيئًا أيها الحراس
وداعًا يا احتضار الضحك وسط مواكب الإخلاص
وداعًا يا التماس الصمت ع الشباك
ما كنتش جاهز أكتب لك
................وزلزلنى احتباس رؤياك
وداعًا والمدى بتاعك
.................. وداعًا والجوارى هناك
وداعًا يا ملاك طالع
.................. وسايب مصر تستناك
ما كنتش جاهز أكتب لك
............... ما كنتش قادر أتهجاك
هتوحشنى
............ هتوحشنى
............................ هتوحشنى الحكاوى معاك
هتوحشنى
............ وهاقول لك إيه
......................... قصايدى كلها وياك
******************************
إلى عم محمد كامل... الروح التى علمتنى الصمود والتحدى (هتوحشنا قوى يا عم محمد)
ابنك
سعيد شحاتة
