ضم
النخيل
شعر : سمير
الفيل
فيه شيء جميل هزني
صعب اني احدد لون او طعم أو ريحة
شيء باهر زي ملمس زرع
حسيته .. هو كمان حسني
خدني في جدايل شعر ، وبتطويحة
شيء ان كتمته
.. تلتمع
بيه العيون
وان خبيته ، تبوح بيه أوراق اللمون
شيء كأنه الجنون
آخد من الضي بريقه
ومن النيل العفي ريقه
ومن الكمنجة حزنها الشفيف
شيء يبدد في قلبي الخريف
أخبي أسراره في نن العين
هو أقرب من الفرح الحزين
أبعد من إني أقبض بإيدي عليه
.. أمسكه
خايف لحد اللحظة موت إني أحدده
الشريط
كتان ملفوف لفة ورا لفة
مفتاح للنيل ، وهزة للتوابيت
تعدية للضفة ده خوف م المغربية
أم تعويذة
للأحجار وللتماثيل
حملني حمل
تقيل
بلعني غلة ، وتمر ، وفصين توم
وهمس ف ودني إني أكون له كتوم
أصعب ما فيه إن المعاني عصية
غزال شارد في مرعى من النجيل الطري
الضحكة دي مرمري
جايز نونس بعضنا
وتصري جرحي
في المنديل
الاخضر ..
بيلبسني ويمسني
الحلم جوه
القلب بيغزني
عصافير غزت
قلبي ، وشالتني
عنين سودة بتبهجني
أمد أيدي
واقطف الجميز
الفرع ف
آخر حتة مش مالكه
أنا طقيت ..
باسند دماغي فوق كتفها
أنا الأمير الخايب اللي باموت
.. على عتبة الحواديت
مش عطياني رغم الهجير ضلها ..
23/ 3/
1989
ديوان
" ندهة من ريحة زمان " / الهيئة المصرية العامة للكتاب / إشراقات أدبية/ العدد 88/ القاهرة 1991.
