كباية شاي
شعر : سمير
الفيل
ما اعرفش
ازاي
إيدي بتمتد خجولة
على كوب
الشاي
تتنهد صورة ، وتقول الآي
الغربة تكر ، تفوت
وانا باقطف
ثمرة توت
وباغني
ف إيدي
خاتم فصُه ياقوت
أنا تايه
في الحر
ومقتول
بالبرد
ومش قادر
ادوق القوت
حنجرتي
ملانة كلام
.. محكوم بسكوت
يانخيل
عالي ، بلحه حياني
أحمّر لونه
، لما شافني حياني
لما سمع الصوت
، اتهّز ، بكـّاني
صامت ،
جوايا بركاني
على وجهي
خشوع
صاحبي اللي
رافع إيده بابريق الموت
بيعب الميه
، وعنيه بتدمّع
رايح لبعيد
.. مش جاي
ما اعرفش ازاي ؟
الدمام
4/ 3/ 1994
* من ديوان
( ريحة الحنة ) / إصدارات الرواد / العدد 37/ يناير 1998.