السويس 1969
شعر: سمير الفيل
الدم مغرقني
من صابع رجلي لراسي
بالقط بصعوبة أنفاسي
وأمر بصوابعي على لحم الحيطة
بازحف ، وصراخي ماليني
بدون أي حذر أو حيطة
أنا شايف جسمي ممدد
في الحفرة اللي قصادي
الموت أقرب من حيل وريدي
مش قادر أخطي بقدمي
أو امد له أيدي
لكن لما صرخت : يارب
سمعت صدى أنفاسي
فريت دفتر إمبارح
فلقيتني مرة مدبوح ..
.. والتانية الرقبة ع السكينة
حطت ع القلب سكينة
لما عرفت ان المدفع اللي قاصدني
أضيق من إنه يموت كل الناس
أغبى من إنه يحصي ..
.. جميع الأنفاس
وضحكت بمرارة ..
لما المدفع 155مللي ..
.. كان يرمي قنابله
من تاني ع الحارة !
..................................
* نتهجى الوطن في النور ، سمير الفيل ، أصوات ادبية ، سنة 2000.
