كان نفسي أبقا نبات صافي
تِتشد جذوري وأمِّد بعيد
ولا تتهدل مني اكتافي
وتتقطع روحي بحركة إيد
كان نفسي أعيش من غير الشمس
وأقول لبقيتي إن أنا عايش
وإن مات الجزء هيفضل جزء
وهحاول أساعده ونتعايش
كان نفسي أمد عيوني لفوق
وألمس أحلام كنت غاويها
ولا إنْ الدنيا تحط الطوق
حواليا وراسي توطيها
كان نفسي أعيش إنسان عادي
أمسك أحلامي وأجربها
وإن بعدت عني أكون راضي
وأنزل لجذوري وأكبرها
كان نفسي أعيش ليومين تانيين
وأموت من غير ما أكون خايف
كان نفسي أعيش ليومين تانيين
وأتمنى أموت كده وأنا واقف
شيرين فتحي
