الدليل
شعر
سالم الشهباني
فى ابتداء الأرض جينا
زى صُدفة
وحدث عارض
كل شىء
قدام عينينا
كان مجرد سر غامض
كنا خايفين م المتاهة
والمجازفة والمَسِير
لما آدم يعصى ربه
تبقى أرضه
هىَّ منفاه الأخير
يبقى محكوم ع البشر
توهة من غير الدليل
كل واحد فينا يبقى
جوا منه ..
ذنب آدم ... روح هابيل
يبقى وارد
ابن نوح
يعصى ابوه
أو يِغِيْرُوا
اخوات جميل الوجه يوسف .. فَيْخُونُوه
أو تموت الناس فى غزة ودير ياسين
يبقى وارد
ألف مرة ينقتل فينا الحسين
والدماء فى كربلاء
ع الأرض... تسرى
والبُكا جُوَّانَا يِحْيَا
هيا دى خدعة سالومى!
هيا دى جراحك يايحيى!!
الرصاص فى كل ناحية
الأمة صاحية للمناورة
إِنَّ بَعْدَ الظُّلْمِ ثورة
جاية من عرق الغلابة
من دموع الطفل.. نايم ع الرصيف
من رغيف العيش
ومن دمع الأرامل
من فَقَارَى كل يوم بيزيده ضعف الضعف
ضعف
ضعف حالهم فى المعيشة
صاب قلوبهم بالكآبة
قال صديقى:
الرهان ياصاحبى يبقى ...
ع الكتابة
قلت: لا؛
الرهان ياصاحبى يبقى
ع الغلابة
اللى داقو الظلم.. والقهر المبين
واللى من ملح الجبين.. خَضَّرُوا تراب
البلاد
واللى سِهْرُوا فى الشوارع
يحرسوا الليل
فى الحضور
والإنصراف
واللى عِرْفُوا المعنى
فى
الاختلاف
واللى بالصبر
استجاروا
واستخارو المولى وكان نصير
المصير كدبة الصدف الجميلة
من البداية
وش نرسيس اللى ضايع
م الحكاية
قال صديقى:
الغياب
هُوَّ انعكاسنا فى المراية
صورة الحاضر وسِرُّه
قلت:
احنا انعكاسه فى المراية
كدبة المجهول وشَرُّه
لعبة القدر المطيعة
الخوف شريعة
للى ساكنين السطوح
جنب يفط الإعلانات
فى الشوارع
والحوارى
البادرونات
واللى حارسين البوابات
من أى عادى
واللى علشانك بلادى..
ماتو قهرًا فى الشوارع
واللى جهرا يذكروكى ..
كل ماتزيد المواجع
قلبى طالع من هنا
من وسط دول
طفل يحبى:
حابا
حابا
شعرى
شارعى
والتاريخ
ابن شرعى للغلابة
اللى ماتوا فوق ترابها
واللى مَلُّوا دق بابها
ف طول غيابها ...
من زمان
واللى روحهم رفرفت
النهارده فى الميدان
كل وقت وليه أدان
ع اللى سرقِك
واللى نهبِك
واللى غَرَّق إبنِك اللى عشان يسافر...
بعتى دهبك
واللى خلى التوب سواد
والبكا أربع مواسم
كان يا بلدى
لا بد لازم من طوفان
من قيامة
من علامة للى خان
واللى بالوطن استهان
واللى خلى البير يجف
واللى خف
وشف
شافك
شمس طالعة من منامه
صافية زى النور بريئة
صَحَّى أهل الكهف قاموا ع الحقيقة
شوفت رب الكون فى خلقه
بان تَجَلَّى
قلبى صَلَّى
فوق ترابك
فى الفرح والشدة فاكرك
كنت هربان من عساكرك والرصاص
كنت باحلم بالخلاص
وبشىء بعيد
وانتى كنتى زى وردة طالة م السور
الحديد
شُفْت كل
الخلق ماشية
شاردة تهتف بالنشيد
تحيا مصر
تحيا مصر
أم الضفاير
لما يتبسم يناير
لما يهتف
بالنشيد
إن بعد العسر يسر
إن بعد العسر يسر
ابتسمت... بكيت... ناديتك..
ياحبيبتى
دواى خوفك!
واخرجي
م الضعف
اقوى
من ظروفك
مهما دارى
العسكرى
يا مصر شوفك...
أو بأمر البيه
ضربنا بالرصاص
جَاىّ بعد
الليل خلاص
جاى بعد الحزن عيد
م النهاردة
ياحبيبتى
روحى
وردة
ف الضفاير
م النهاردة
يا حبيبتى
قلبي مرسال البريد
م النهاردة
ياحبيبتى
التاريخ فى اللفة
يضحك
للى ثاير
لو سألكم حد عنى
قولوا إسمى يا ناس يناير... م
النهارده
م النهارده
يا حبيبتى
مش
هخاف
ف الحق موت
اويصيبنى
كل مرة
عند بابك السكوت
هبتسم
واصرخ
واغنى
للخلاص
زى طير من سجنه طالع
قلبه مليان بالحماس
شكرًا لهذا الشعر
علمنى
احترام
اللفظ
والكلمة
احترام
الناس
شكرًا لهذا الضل
يكسرنى
وينكرنى
فى قربه ثلاث
شكرًا لهذا الليل يعلمنى ماخافش رصاص
ويشهد كوبرى قصر النيل
فى هذى الجمعة فى يناير
أنا غضبان
أنا ثاير
أنا فرد الحمام طاير من الأبراج
ينادينى النشيد أنزل
يصيبنى فـ السما خرطوش وانا أعزل
أنا ماكسرتش
القوانين
ولا اتْعَدِّيت
ولا اتْخَطِّيت
حدود الكلمة والمبدأ
أنا غنيت
لحلم بيتولد شوفته
وشمس شوفتها بتشرق
صرخت بعزم ما فِيَّا
على الآخر
أنا فتحت
أنا فتحت
أنا فتحت.. شوفت الناس سيول من نور
تثور ع العتمة والسجان
وترجع قيمة الإنسان.. لمعنى كلمة الإنسان
هنا يسقط جنود فرعون
أمام الشعب
هنا تتكسر القضبان
يدب الرعب فى قلوبهم
ويرهبهم غُنَا الكروان
وِوَقْفِة شعب قدام الرصاص الحى
يفسر يوسف الرؤية.. ويقرا الجَاىّ..
من الحاضر
هنا يِطَّمِّن خليل الأمة على هاجر
تهاجر أفئدة من الطير
لهذى الأرض
وِيِخْضَرّ الشجر يِطْرَح
جناين ورد
على الجَانْبِين
وتفرض هاجر القوانين
على الواردين مياه البئر
يمامة فى الخلا واقفة
ماهيش خايفة
لا من بومة
ولا من صقر
هنا الثورة ماهيش ثورة
لجوع أو فقر
دى ثورة عدل حرية
بلاش دم الشهيد يبقى
مجرد دم ع الأسفلت
نِشِف
أو
جَفّ
بلاش نلتف ع الأشياء
نتاجر كدب بالفقرا
نجادل بعضنا ع اللون
وقال ادبحوا بقرة
ومين يقرا التاريخ يعرف
بأن الْمُلك..
مش دايم
ولا دايمه أحواله
قارون هايم بأمواله
وِغَرُّه الجاه
نِسِى مولاه
وعند المال صَبَح
واحد من الأسرى
ومين يهوى
أكيد يهوى
تصيبه الغيرة
والحسرة
وفين راحت
جيوش فرعون
وجاه بلقيس
كنوز كسرى
صَرَخْت
الشعر وَقِّفْنِى
قلبى.. للغنا أسرى
أنا إبن الرعاة
حاطين فى هذا الوادى
من فترة
وإبن الشاطرة
اللى ربتنى
أقول الكلمة ترضينى
ماخافش القول...
ولو كانت دماى ع الأرض سيالة
وإبن الإيد اللى عمالة..
بتغزل فى الحرام الصوف
وتربط عقدة النول
وتملى جرة المية
تِغَنِّى
(يَامَّة مُوِيْلِ الْهَوَى
يَامَّة مُوِيْلِيَّا
طَعْن الْخَنَاجِر وَلا
حُكْم الْخَسِيْس فِيَّا)
أخويا الصقر
أختى الغزالة
تحجل على التل
أبويا الجبل ما اختل أو هادن
رياح الكدب لم هزت لابوى رَادِنْ
سألنى صديقى عن آخر غناه فى الحلم؟
فقولت: العلم بالأشياء.. بيكشف كدبة
الأشياء
فلا الثورى
بقى ثورى
ولا الشاعر
بقى شاعر
ومين تاجر زمان بالحلم ...
فى هذا
الظرف
هيتاجر
وهيبيع الوطن
خلسة
بلاش ننسى.. بأن الخسة مابتسقطش
هنا
التحرير
هنا
التحرير
بيشبه مركبك يا نوح
بشوف الصادق..
العاشق غُنا بلاده جميل الحس
واشوف
التاجر
البياع
واشوف
المجرم
الْمُنْدَسّ..
ربيب الكدب والشعارات
تلات سلامات
على الشهداء
الشهداء
الشهداء
ومين لَفِّك حزام ع الخصر
وغَنَّالِك فى يوم النصر يا بلادى بحق
النصر
هنا مصر
هنا مصر
هنا مصر
قصيدة بتنكتب بالدم
وبالحلم اللى رفرف طير
وغَنَّى فى الميدان
ثورة
وحاصر مهما هتحاصر
هنا عرابى
هنا زغلول
هنا ناصر
هنا الشعب.. العرين.. كاسر
وحاصر مهما هتحاصر
بلادى غنوتى السمرا
خروج الناس
ماهوش
كدبة ولا مؤامرة
اضرب فى شعبك بالرصاص.. وابتسم
للكاميرا!!
كَسَّرْ بجهلك
كل غالى
أو عزيز
هنا القِمْرى هيهجر شجرة الجميز
هَيِبْنِى فى السِّمَا عِشُّه
وهيلف الزمن وِشُّه
وِيِصْفَى لنَا
نشوفه ويَّا أطفالنا فـ مدارسهم
بيكبر جوا كراريسهم
زمان تانى
وبلاد تانية
زمان حاضر
برىء من كدبة الماضى
ومن تضليله.. من زيفه
ومين صاغ التاريخ كتبه على كيفه!!
ومين خادع رفع سيفه
طمع فى الدنيا.. مش إيمان
هنا خدعة الأموى
وقميص عثمان
خطيئة آدم وتفاحته لبنى الإنسان
متاهة موسى
خزاين يوسف
وتفسيره لرؤى الحاكم
وسبع عجاف
وسبع سمان
هنا يلتقى الجمعان
هنا الإنسان تاريخ الأرض لو تنطق
هنا الكلام يفرق
والقصة راح تختلف
كل التاريخ اترصف
واتغير الكورنيش
تقدر تشوف كليوباترا
واقفة فْـ طابور العيش
مجنون العامرية
فى محطة المنشية بيعاكس (المشاريع)
وبياعين البسارية.. والصيادين فى البحر
ليلى بقالها شهر عنى ولا بتسأل
سألت كل الناس
عنهاولم أوصل
ولا حتى دلونى
نكرونى لما بكيت
وسابونى لجنونى
وقالو مش نافع
أنا كنت زى الطير ع الحب بيشابى
زى النخيل يافع
مش كل حد اتظلم قادر وهيدافع
ياصاحبى ماتعدش
زيد الصلاة ع النبى
واسكت ولا تردش
ظابط بيتغابى
على بياعين الفل
والخلق فى السكة
ناصب فى راسه كمين
مسكوك بميت سكة
ولا عمره يوم يتحل
سايبنى ليه فى الطل
هُوَّ الميزان اختل؟ ولا انتو
نسيتونى؟
واقف لوحدى شريد
قلبى يتيم فى العيد
والفرحة كدابة
نبحت كلاب ع الجسر.. عوت ديابة
أنا صرختى دَوِّت
قصيدتى بنت الغلابة
بنت المتاح والصدق والممكن
بنت التاريخ محفور على صدور الغلابة
الحكى قبل الكتابة
أبوزيد وكل الزغابة
راحلين على تونس
البنت عشقت يونس
كسرت بإيدها الحجر
خَضَّر فى قلبه الشجر
والحكمة لو فى الصبر.. يبقى التسرع
ضجر
البدو غير الغجر
لكل منهم قانون
مش كل كن فى يكون
فى الإختلاف معرفة.. فى المعرفة شىء م
الجنون!!
سليمان عليم بالجن
والطير... والبشر
عرش الأميرة هنا قبل ارتداد البصر
والعبد ربانى
نصر الرسول وفْـ بدر
حضن الصحاب حانى
حزن الصديق مش حزن أو خوف وشىء مجانى
حزن الفراق
عن أهله
عن موطنه
قاله الرسول: لا حزن..
طبطب عليه طمنه
هنا الكلام يفرق
والقصة راح تختلف
يا أميرة الفراشات
أنا عمرى
واخده سلف
وهَارُدُّه للمولى
شايفك فى كل الحاجات لا قوة ولا حول!
مشاعرى وهاجة
سامحينى لو فرت
زى الحمام... م البرج
هى اللى حيلتى يجوز... سفينتى عند الطوفان
فرسى فى زمان العرج
الكدابين
الأدعايا
مرضى النفوس
أتباع بَسُوس فى الفتنة وشرار الحرب
خدم الولى
شر البلية الكدب
الكدب شر المبتلى
رفعو القصايد ع الأسنة مكيدة
وقفنا احترامًا للشعر احترامًا
للقصيدة
آمِنَّا بالحكمة فْـ بلوغ الصبر
مشينا جبر
لشىء مانعرفهوش
كل الوشوش ع السكة تشبه بعضها
ماشيين بأمرالحكم والعادة
كانت سحابة فى السما صايبها طلق
الولادة
نزل الشوارع بشر
قلبى انفطر
م الفرح غنى
قاللى الصديق:
دى الثورة يظهر!!
أنا بعت يوم الحنة فى الأزهر
ووقفت ببخورى
وعطورى.. أسترزق
كان خوفى م البلدية.. (فى بلاد يقولوا
الإزالة) يمنعنى.. أرفع صوت
كان عندى اشوف الموت ولا اشوفش هذا الوش
صاحب بلادة وجهل
وبلاغة فى الغش .. والظلم والباطل .. والكدب
بزيادة
نظرة يا اصحاب السيادة
لو كلامى فْـ يوم أشار
للغلابة
المطحونين تحت خط الفقر جبرًا
أو فى مرة
صرخت جهراً
من همومى
ومن جنونى
قولت كونى
كونى زى الطير.. وكونى.. فُلْك نوح
روح موانسة ضِلِّى عارفة
حاسة بالجرح وبكايا
كونى زى الشعر ثاير
سندريلا فى الحكاية
ليه تسيبى الجرح غاير
قلب بيصيبه الرصاص فى المظاهرة فْـ ليل
يناير
بعد يوم عشرين
بخمسة/ الزمان
وقفت الكلاب بتعوى ع الميدان
سَانَّة لولادك نيبان.. الظلم بان
وانكشف كل اللى كان/ فى ليل يناير
تاجروا بالقصة وما فيها
واوعدونا بالخلاص
واضربونا فى المظاهرة بالرصاص
انتو أصحاب السيادة
والمعدل والفوائد
والموارد والعوائد
والشواهد والموائد
والكلام عن دخل فائض عن جيوبكم
دوسو أشجار اللمون اللى فْـ دوربكم
هِدُّوا أبراج الحمام
كَسَّرُوا بيوت الغلابة
واوصفوهم بالخوارج عن نظامكم
دُوْسُوا ع الحلم بجزمكم
امتثالاً للنظام
اسجنوا النور ان هزمكم
امتثالاً للنظام
اكسرو الحق ان قَسَمْكُم
امتثالاً للنظام
بُكْرَة من صلب القصايد تنطلق أسراب
يمام
بكرة من صلب القصايد جَاىّ شاعر
يبقى ملح الأرض وترابها وشجرها
يكشف الكدب فْـ عينيكم
وانتو زى الغيمة سودا فوق سماها
دود بينخر فى جدارها
انتو أسوأ ما فْـ قدرها
انتو نارها
وانكسارها
واختصارها.. فْـ رأس مال
فيلا كانت أو فى قصر
بُكْرَة من صلب الغلابة تيجى مصر
سيرة ذاتية
سالم
الشهباني
ـ
ولد فى 10/4/1979بمدينة حلوان محافظة القاهرة
ـ
تخرج فى كلية الحقوق جامعة القاهرة
صدر
له:
ــــ
ـ
ديوان " ولد خيبان " شعر بالعامية المصرية عام 2006سلسلة
الكتاب الأول المجلس الأعلى للثقافة
ـ
ديوان " السنة 13 شهر " شعر
بالعامية المصرية عام 2007الهيئة العامة للكتاب ثم دار اكتب للنشر والتوزيع ثم
طبعة ثانية مع نفس الدار
ـ
ديوان " القطة العميا " شعر بالعامية المصرية عام 2008 دار اكتب للنشر
والتوزيع /جزء أول من مشروع عن الألعاب الشعبية للأطفال
ـ
ديوان " الملح والبحر " شعر بالعامية المصرية عام 2009دار اكتب للنشر
والتوزيع
ـ
ديوان "شبر شبرين " عن الألعاب الشعبية للأطفال فى وجه بحري دار اكتب للنشر والتوزيع 2010
تحت
الطبع
ـــــ
ـ
ديوان " أدان الهجر "
شعر بالعامية المصرية
ـ
ديوان "حديرى بديرى "عن الألعاب الشعبية فى وجه قبلي
ـ
ديوان "أنا أشبه لشارع على أوله يافطة ممنوع الانتظار" شعر بالعامية
المصرية
حصل
على :
ــــــ
ـ
جائزة التفرغ من وزارة الثقافة عام 2006 /2007/2008 /2009
ـ
الجائزة الأولى من معهد جوته الألمانى فى شعر الـslam عام 2007
ـ
ُدِّرَست له بعض القصائد فى كلية الآداب جامعة حلوان
ـ
ترجمت له بعض القصائد إلى اللغة الروسية واللغة الإنجليزية واللغة الفرنسية
ـ
حصل ديوان (القطة العميا) على المركز الأول فى استفتاء أجرته جريدة روزا ليوسف عن
عام 2008
ــ
تم ترشيح ديوان (السنة 13 شهر)من أهم خمسة دواوين عن عام 2007 فى استفتاء أجرته
قناة النيل الثقافية برنامج (أوسكار النيل الثقافية)
مثل
مصر في
ــــــــــــــــــــــ
ـ
المؤتمر الدولى للشباب العربى فى الشعر والقصة
بسلطنة
عُمان عام 2006
ـ
المؤتمر الدولي الذى حمل عنوان "الإخاء الشبابى بين مصر
والسعودية"
بالمملكة
العربية السعودية عام 2008
ـ
شارك في العديد من المهرجانات والمؤتمرات داخل مصر
قام بالتحكيم في
ــــــــ
ـ مسابقة
كتاب جديد فى السوق فى شعر العامية
ـ
مسابقة نشر جماعى لشعر الفصحى والعامية
ـ مسابقة بيت
العينى للطفل لإلقاء الشعر (فصحى) ( وعامية)
ـ ختام
النشاط الثقافي للعديد من الكليات بجامعة حلوان
ـ ختام
النشاط الثقافي للعديد من الكليات بجامعة فاروس
