ماحناش احباب
وكفايه اما اشوفك اسلم عليك
خلينا اصحاب
منتاش الفارس ليا
وفاتتنى وحيد
وكأنى المتيتم ف العيد
والحزن ورايا
وقدامى
وحوليا ..مابقينا أغراب
خلينا اصحاب
طيب من الأول خلتنى أهواها
ضحكتها تزعرد لما القاها
حلفتلى بالله الواحد
قلبها مابيعشق غير واحد
وانى المعشوق
طيب ليه اختارت قلبى
تلاغيه بالشوق
يمكن علشان انا قلبى عبيط
بيصدق حتى الكداب
ولايمكن علشان كونى فقير
غير جواها حاجات
طيب ماهى عارفه ان الجيب فاضى
لا لبست انا ليها بدلة ظابط ...او قاضى
ماهو باين ف ملامحى
الماضى
والحاضر
والأتى
وكل اللى امتلكه فؤادى
وقلب شريف
زى الطير الحر
وتملى
للقمره وليف
وبحنى ايديها ورجليها
وبخبى احزانى عنيها
وبطلع من عبى
مليون موال يتغزل ف سناك
انا العاشق ياحياتى
راشق
ف القلب هواك
بصلى لجمالك
مانتى الممالك
وزيك مفيش
ياضحكة ملاك .. وكلمة نبى
تخلى اللى مات ..يرجع يعيش
ويرجع يموت لو تغربى
فكيف ابقى صاحب
بعد اللى كان
وادارى الحنان اللى عمره ماغاب
خلينا اصحاب
راح تنسى بمرور الأيام
ومصير الحزن يعدى
طب اعمل ايه دلوقتى
الحمل تقيل ياحببتى
وانا دمى سال
والروح
بتنوح ف فراقك
بترتل أورادك
والوجع اللى ف قلبى جبال
ولا شايف من فوقى ولاتحتى
وكأنى سراب
خلينا صحاب
ماحناش احباب
وكفايه اما اشوفك
اسلم عليك
فمد أيديك
...مد أيديك