بتهرب منى
احلامى
وبتجينى كما الاهة
ومن عينى
يطل صداها زى دموع
تفر بسرعة
وتسيبنى
ما بين الحلم واليقظة
وتدهسنى كوابيسى
وتسكن
روحى ف لحظة
وابقى فيها باتقلب
على شفرة
واموت واصحى
وانا غرقان
ف قلب كابوس
بوجه عبوس
واتغطى بسواد الليل
واحاول افر واتهرب
يكبلنى
يقيدينى
وابقى حبيس
ف زنزانة بلا جدران
بلا قضبان
ف وسط جزيرة عمرانه
وانا لوحدى
شريد عطشان
واقوم همدان
كأنى ما نمت
ولا مريت بلحظة نوم
تريحنى
تخلينى
احس بنعمة النسيان
وانا انسان
باحب اعيش واتكلم
عن الاحلام
وباتعب لما مش
باحلم
وباتألم
من الوحدة ف زنزانتى
اللى بتضلم
مع الايام
ولما بانام
..................
حسن وهبه
