جوايا عتمه و برد و غرابه
جوايا حزن بيشبه الغابه ..
و الشمس كدابه ...
فـ جوفي مبتطلعش !
رغم الوعود منها
اللي مبتخلصش ..
أنزل و فاتح قلبي ف الشارع
أستنى لو خيط م الضيا لامع ..
يدخل ينور قلبي ..مبيدخلش
كل البشر نظراتها مغشوشه
و إحساسها كتماه جوا مبيتقلش.
كل البشر خايفين من العيشه
و اللي يخاف من حاجه ما بيعش
**
عايش و فاتح قلبي ..ع الآخر
و الحزن بيزقني ..ع الحياه لقدام
يضربني بالأقلام ...و بالأقدام
يسألني دايما ف عبث ساخر
هتعيش معايا لآخر االأيام؟
عمال أدور ف عيون الناس
على شط ينجدني من الغربه
على حد ينجدني من الإحساس
إن الحياه ف توب البشر صعبه!
عمال أدور ف الحياه على روح
تقف قصاد الدنيا في صفي
و تدوب ف روحي ..فيلتئم ضعفي
تشعل ف جسمي الرغبه إنه يعيش
تفتح لقلبي إلبيبان و الشيش
و تقيد قناديل للضيا ف سقفي
**
محتاج أغير نكهة الأيام ..
فوق كل حاجه زاد تراب الملل
محتاج أصادف ..شيئ مهش محتمل
محتاج أعيش ف كل يوم تجربه
دي لو الحياه من غير ثبات متعبه
فالعيشه من غير الجنون ..الموت !