النيل بيرقص فوق رصيف شبرا
..........................
**************************
- سعيد
سيرة وطن... وتاريخ بلاد متحاصره وبداية نضال أُمّه
محموم ومش عارف دوا الحمّى
يا صاحب الهمّه المرابط فوق عضام روحي... مرغم على بوحي
مجبر على جروحي في حنايا الجسم
اسمي سعيد حامد ... وقالوا إني ما عنديش اسم
- سعيد
ثورة قامت!
موت حصل!
ريّس مراهن ع المرض والزحمه.. مارشات ادّعاء..
أنباء غلط... أخبار ومانشيتات غلط..
تصاريح وأحلام بالعبط وشعوب بتخلص في الغباء والجهل
أناشيد بتغلي في البطون كالمُهل
شهداء في جنة ربنا بيتوضوا من ريق النبي...
أوجاع على الأسفلت... مبدوره بعنايه...
بدايه للموت البطيء ...
دم الجريء كالنهر فوق الطريق...
سكّر... وكام وقّة دقيق
إعلان صابون
أومو
كوكاكولا... بيبسي
حلاوه من سيدي إبراهيم .. شِي الله يا سيّدنا
أحرار وطعم الذل قيدنا
تراتيل في حيّ السيده..
تعديد على ناصية سيمون...
اتنين لمون وجيلاتي للبهوات في فندق محترم..
قلب اتخرم برصاصة القناص..
ديابه بينهشوا ضحكة ضحيّة من ضحايا الليل ...
قنديل بيتهز بشجن في الشارع الخلفي
عبد العزيز على قهوة الألفي
الحلم ماشي بيبتسم خلفي لبنات القاهره الصابحين
"عدى النهار" والصمت أصبح شاعر الثوره
البنت كانت ماشيه بالدوره بدون حفافيض
ضحكة حبيبتي من الحضيض طالعه بشواشي جريد
تعديد على ناصية سيمون...
كل الكلام همايون في أوتار الخريف
الدم مخلوط ع الرصيف
دا دمّ طاهر واللا دمّ شريف
صوت الرغيف بيحرّك التماثيل في عزّ الحرّ
يا قلبي يا مضطر ع التنهيد
سيخ الحديد ع الجلد بيعلّم
مد الصديق كفيه ولم سلّم
ضلّم عيونه وفات مع الفايتين
"والتين والزيتون" قرا الشاعر على الساكتين
مدوا الإيدين واستكفوا بالضحكه
فرطوا العرق من قبضة الكحكه
والكحكه في إيدين اليتيم إجرام
إديني ساعه أتوضى في الحمّام
وأغسل عيوبي وأصير كما الضرغام
يا أيها الإبهام في كفّ الإيد
..........................
-سعيد
سعيد مشغول بشيء أغرب من الغربان وأجمد من حدود الذاكره المفطومه ع الحنضل ...
سعيد تايه ورا النداهه والمندل ... وخايف ييجي يوم وينام ويستندل مع الرفقا
سعيد لسّه ف إيديه الصبح وف حلقه ةالكلام الطيني وف قلبه الرحيم شفقه بجميع الناس
سعيد لسّه ألاعيب الحواري الضيّقه ما خدتش إحساسه ومازال حسّاس
سعيد خايف يصير جسّاس وياخد من كليب نفقة جليله الطاهره بعد الموت...
سعيد لسّه بيستنى الغلابه تفوت
سعيد لسّه بياخد حقّه بالنبوت وبيحاجي
سعيد لسّه عاشور الناجي للحرافيش
سعيد لسّه ف حشاه شاعر ولسّه ف طلّته درويش
-سعييد
عيشنا القديد صراصير
كل العيال متحاصره في التحرير
مارد طويل بينط في دماغ الضرير..
هزّة سرير أمي النحاس مزيكا في عروقي..
الأرض تحتي وربّنا فوقي وفوق الكل
يا بياعين الفلّ والعناقيد
سيخ الحديد ع الجلد بيسن الأثر
قلبي القزاز على قلبك العاج اتكسر
ما اعرفش مين كان انتصر ولا تعرفيش مين كان خسر ولا مين حصر روحه وطرح عناقيد
ولا مين بيخطف فرحة العواميد
-سعييد
كوباية الشاي العتيقه في قهوة البستان...
سنان الشيخ ريحان .. وتمثال سعد في الأبروا ...
النيل بيرقص فوق رصيف شبرا
دبلة هدى شعراوي في صباع مصطفى...
نور الطريق اللي انطفى فجأه...
صاروخ رمضان ومدفع شهر أيلول العظيم...
صوت سيّدي رفعت...
آدان الفجر في البحر البعيد...
وجع القصيده المجهده العاصيه... انتحار الشمس ع الترعه... البنات في الحر..
ثوره اتحركت في الشارع الخلفي.. الرصاص زي المطر...
صاحب محل الخردوات قافل...
كل الجحافل نازله في الميادين ...
الميّه في البناطيل وريحة الشرخ في البطاطين
قال الحزين للحزين ساعة هجوم الحزن... "أصاحب مين"
غنى اللئيم للثوره واتدارى
هنا ماسبيرو ع الكورنيش
شاويش بيقول بيان لشاويش
ياميش رمضان
حلاوة ستنا المانيكان
أغاني زمان
لومان مفتوح على وسعه ف ليالي العيد
-سعييييد
بطاطا ولب وسوداني
رغيف ضاني
جمال مصنوع وربّاني
جمال هيقول بيان تاني في إذاعة مصر
عبرنا وسففونا تراب وحلينا بأغاني النصر
بليغ حمدي
حليم ... ماسبيرو ...
حماده هلال بيستهبل
بيان تالت وعيشه هباب
جيوش السلطه بتجهز قنابل غاز جديد لمواجهة الإرهاب...
حساب الفيس بيبعت سكس للأصحاب...
أنا غايب ... أنا حاضر.. وواخداني الليالي غياب
..................... ك.. ر.. ررر... ببب...
ضحكة حبيبتي المخلصه بتحرّك الشعله... الصرخه في التحرير في الروح بتستعلى صوت الشخير في شوارع الوطن المثير أعلى
الريّس القادم هيفتح جسر بين مصر وجيبوتي الطيّبه ... وهيقول بيان فاصل في أمر معاهدة الرمّان... وهيحرر عبيد أثيوبيا من سطوة جنود غزّه العظام...
الريّس القادم هيفرش مصر بالسمسم عشان المخلصين أمثالي بيحبوه ...
الريّس القادم هيعزم شعبه في القصر الكبير ع الأكل يوميّا وهيشبّع بطون المحتاجين
الريّس القادم ... هيؤم الملايكه ويظبّط زوايا الثوره في المحراب
..................... ك.. ر.. ررر... ببب... حتّة غطا م البرد يا لبلاب..
-سعيد....
شكل الكلام غامق.. قصايدي ف قاعدة الكتاب
سراب واقف يزيح في سراب
وبشّرهم بموت ناجز إذا كان ع الخريطه غراب
-سعيد
ضربونا في الخلاليط... وزيط أصبح يساوي معيط... عبيط ساحب وراه مساخيط... وناس شربوها بالعنّاب
-سعيييييييييد
اصحى الوطن نايم ... وجيش الورد متأثر بصمت الطيبين ع الباب
-سعيييييييييييييييييد..
ثوره
-سعيييييييييييييييييد..
ثاير
يناير جاي في فبراير ... وزمزوم أكلوه زرياب
-سعيييييييييييييييييد..
أحرااااااااااااااااااااااا
***********************
سعيد شحاتة
