بحركات مؤلمه
ولون مبهج
لمانيكان
فرحان بلمة أصحابه
ف باترينة العرض
لموسم جديد
ومُتابعه لوشوش البنات
وهيه بتتمنى
فارس أحلام
بنفس المواصفات
بضحكه طبيعيه
وتسريحة شعر
مرصوص بيلمع
وعود معدُول
من غير كِرش
ولا ريحة رِجلين
فرحان
وف انتظار
الاحتفال الليلى بعد طفى النور
وسحب الباب
وخروجهم
م الباترينه الرجالى
واستقبال البنات
م الباترينه الحريمى
لمقابله
ف حفلة قلق ليلى
ف محل مقفول
أنا وهيه
من غير استئذان
على مزيكا أفرنجى هاديه
وراسها ف كتفى
وايديا ف وسطها
واقعين ف رقص
من غير تحرك لأى غريزه
بمتعه ما تتوصفش
وارتباط
مستحيل يتحقق
لبنى ادمين من لحم ودم
واقعين ف الرقص
من غير شكشكة دبابيس
ولا أسئله
عن طبيعة العلاقه
مع كركرة الباب الصاج
كله بيرجع للبتارين
من غير ولا حركه
ولا نفس
عرايا تقريباً
والبنات بتعدى
واقعه ف كسوف
وهما بيلبِّسونا
لبس الموسم لجديد.
