عَم دُنُجل
عَم دُنُجل قاعِد هِناك على قَهوه بلدى
جاله الافندى الريجيسير
بأوردر أبيض عشان يمثـِّل
قال عَم دُنُجل دى والله فُرجتَ
كومبارس عادى ..ودى برَضه شُغله
مِن قاعده فاضيه على قهاوى
حلمه يمثـِّل إن شاالله لقَطه
برغم إنك بـِرمَشه تِقِفل.. عينَك للحَظه
ما تشوفْ أخينا
لا ف شاشه دهبى ولاحتـّى فضِّى
وبعد فتره تلاقى عينَك واَخَده عليه
عارفـُه بَشُكله ومِش بإسمُه
وآهى برضُه شُغله
مِن قاعده فاضيه على قهاوى
يا عَم دُنُجل ع الدَرجه إحجِل
لـوِّن وشكِـّل وحادِى بادِى
سُكر نباتى غَزلى وبناتى
شَراب صُغنـَّن بِوردَه حَمرَا
وجَزمَه بيضه فى اقدام حَفيدتك
قالِت يا جدو الِشنطه نونو
متعلقه ف اكتاف عَروستِى
وعرُوستى دوندون..بتغنى دِندِن
وعين تِفتـَّح والتانيه ماشى
ولِسَه دُنُجل قاعد هِناك على قهوه بلدى
كومبارس عادى جاله الأفندى الريجيسير
بأوردر أبيض عشان يمثـِّل
قام قال ف نـَفـْسه وبعلو حِسُه
دى والله فـُرجَتْ
مِن قاعده فاضيه على قهاوى
