مكملين
شعر : ميسرة صلاح الدين
كانت بعيدة
زى عصفورة فى السما
كانت قريبة
زى صورة فى محفظنى
كان من الطبيعى
انى أسأل نفسى
يا ترى
القاهرة
فيها شوارع كفاية
نمشى فيها
لحد
ما نتوه من بعض
يا ترى
القاهرة
فيها شوارع كفاية
نهتف فيها
لحد
ما نلاقى الحرية
يا ترى
مسموح للعساكر
يدوسوا على صدورنا
بأنفاسهم التقيلة
ويلعبوا
فى ضمايرنا
بصوابعهم المكهرية
لغاية ما نكفر
باى حضن دافى
بعد سفر طويل
لغاية ما نقبل
بأى ركن ظلمة
بين الموت والحياة
عارفة
انتى الحياة و الموت
انتى المعرفة والحرية
وانا ح افضل كده
ازق فى الصخرة
لغاية م اوصل
لقمة الجبل
لو حتى ح اقع
ألف مرة
مش مهم
المهم
أنى اول م اوصل
لفوق
حرسملك جرافيتى
بعدين ابص للسما
وأصرخ فيها بعزم صوتى
" مكملين "
