الحزن ساقط
من نهار السما
شجر ع الأرض
لعيال بتجرى تعد ع المسافات
الورق الدبلان فرقه
يمكن بتحاور حنية ضربات القلب
ف سباق القطر الواقف ثابت
على توقيت الصمت الناطق
صوت الخرس بالآه
ماتضحكوش
كوميديا سودا للدموع
ريحة الوجع
مناديل بتعشق السخريه
فاكرين المشهد المقسوم بنهايه مفتوحه
يااااااااااااااااااااااااااااااااااااااااااااااااه
خلى الجمهور متوحد مع روحه
محتار يختار من عينه اللون الأنسب للنور
شايف ضل دموعنا مصاحب الكروهات
يمكن دا لأن العادى عدى حدود كل مجاز
ولما بيبتسم فينا
بنعيش مفاجأة الصدمة
وكإن السلك العريان من روحنا
ماسمحش بحالة الاستئذان المعتاد للفرحه
شكلنا على بعد تالت للحياه هانطل
غنى على أورتار اللحن تجربتك
ياما ......
عديت السما زمن خوفك على بكرا
جرب تشوف الأرض ف نهارك
واقهر فكرة التغييب ف مؤامرة الأحزان
جواك عوالم وكائنات حره
كل اللى محتاجاه يادوب
جمع جوهرتك بصمة روحك
حضنك المخطوف م الحلم
جمع إنسانك التايه ع الخوف
وافتكر السما والتوقيت
والقطر الواقف ثابت
ومعاركك العامله تحدى للفكرة
وحواسك الميته والعايشه ف توب واحد
وساعتها هاتقول ازاى
أخطف حزنى الساقط من نهار السما حريه