سامحينى وحقك على راسى
معلش الغيبة هناك طالت
سامحينى ومش حِمل عتابك
ولا حِمل انى اقف على بابك
ولا تفتحليش.............
علشان جواكى حاجات صبحت مبتشبهليش
نفسى أعرف مين فينا الخسران
او مين الأدرى بجرح التانى ومين مداريش
الطرف الميت
ولّا الميت بس اهو قرر انه يعيش
واهى دايما ماشية وبتعدى
واحيانا تقف ف مكانها ومبتعديش
اصل الأحزان لحظات تضعف
وساعات بتموت م تقويش
مضطر اقولك دلوقتى تصبحى على خير
يمكن أتأخر بكرة كتير
لكن هبعتلك تلغراف
كالعادة هكتبلك تحتيه
بالقم الجاف وبخط كبير
على نفس الوزن وع القافية
م الجزء الميت جواكى
للجزء العايش بالعافية
انا يمكن سبتك بإرادتى
لكن مغصوب انى اكونلك
لحظات دافية
*******************
مـى منصور