الشرنقة !!
قطع جدار الشرنقة
واخرج بأه
كفاياك شقا
كفاياك تعيش رهن السجون
والمشنقة !!
اخرج بأه
واصرخ بأعلى الصوت
بطّل سكوت
بطّل تموت !!
بطل تضيع
بطل تصيع
بطل تكون تابع وضيع !!
أخرج بأه وبطل دموع
بطل ركوع
بطل رجوع
بطل تجوع
ضيعت عمرك فى الخضوع !!
قطع جدار الشرنقة
واخرج بأه !!
***
قالوا عليك أعمى البصيرة والبصر
حواليك خطر ..
فوقك خطر
تحتك خطر
قدام عنيك كل الخطر
مسكين بتحلم كل ليلة بالمطر
فين المطر ؟ !
أرضك جفاف
مع ان نيلك لسه بيزور الضفاف
وأكلتك بتاكلها حاف
وجتتك محرومة من دفء اللحاف
دا انت لو طور
لازم تثور
اغضب بأه
واخرق جدار الشرنقة !!
***
الجد مصرى
الأب مصرى
وانت يا مصرى ضايع ميراثك
ومطاطى راسك
الأرض أرضك
والزرع زرعك
والحصد ( حصدك )
والخوف محاصرك!!
***
يا أخينا فوق من غفلتك
انهض وقوم
كفايانا نوم
واعرف بأه فين سكتك
قول كلمتك
لو هى نار
شعللها فى وش التتار !!
خليها سيف
ينفعك وانت فى طابورك ع الرصيف
علشان رغيف
خليها سيف
يقطع جدار الشرنقة
وتخرج بأه
اخرج بأه !!
***
مستنى ايه ؟ !
مستنى دعم يفوقك
دا اللى انت فيه
بحر الهموم ومغرقك
مستنى دعم العولمة ؟
اياك فاكرها معلمة
أو مغنمة !!
دى حكاية صعبة وأساسها وعى وترجمة
زى الكتاب الأجنبى
وعشان تسود , محتاجة ( نبى ) !!
كفاياك وفوق
اطلع لفوق
وافهم بأه
افهم بأه
***
ازاى تعيش عمرك حبيس
محكوم بخيط الشرنقة
والله عليهم رايحين جايين
من شرم الشيخ للغردقة
وولادك بعد التعليم
تايهين ضايعين
عاوزين يشتغلوا ولو عمال !!
وولادهم بعد التدليل
وفى سنة واتنين
بيكونوا رجال أعمال !!
مع انك من نفس الأرض
ونفس النوع
من صلب الأب ورحم الأم
لكن جربوع !!
بتعيش العمر فى هم وغم
وجووووووع !!
عارف ليه ؟
علشان أصبحت هجين
مش مصرى أصيل
واحد تانى من غير أحاسيس
لا هو خوفو ولا خفرع ولا رمسيس
واحد بيمرمغ راسه فى قلب الطين
مع انه لو شد الحيل
حيهد جدار الصمت وجبل الخوف
ويقاوم خفافيش الليل
الناس اللى بتفسد وبتسرق وتبيع
الناس التافهة اللى بتصنع جو التطبيع
ولأنى واثق انك مصرى أصيل
بصرخ فيك وبقولك يا ابن النيل
قطع جدار الشرنقة
واخرج بأه
اخرج بأه وبطل سكوت
بطل تموت
بطل تموت
بطل تمووووووووووت !!
محمود خفاجى 1/12/2008
