مثال توضيحي
____________
ساعات احس الناس بتبصلي
وتستغرب
كإني كائن فضائي
او أي باد جديد ما نزلشي بالكتالوج
وباحسهم بيقلبوني
ويجربوا زرايري
ويفكروا
لو ليا شفرة ولا ماليش
ساعات
باتفرج عليهم من سكات
وهما واقفين يدرسوني
ويحاولوا يفسروا فيا
لبعض
كتير بابقى نفسي أقول
الكلام ده مش صح على فكرة
لكني عارفاهم كويس
ما بيصدقوش
بيقولوا اللي تعرفه احسن
م اللي ما تعرفوش
وانا رأيي إن اللي ما يعرفك
يجهلك أحسن
ولا يجدفشي فيك تطبيش
وباحس إني وقعت من السما
واستلقّوني عالم عاملة مدرسين
خدوني
مثال توضيحي
للي مش فاهمين
عشان يقولوا انهم
مش زيهم
وباتفرج
على المستكشفين
اللي جايين بالعدسات المكبرة
واللمبة الكبيرة على الدماغ
ينبشوا ويفتشوا في معالمي
يمكن يلاقوا دليل على سلالتي
في ارضهم
وباتفرج على المحققين واضحك
فاكرين نفسهم مستخبيين مني
وانا بامثل إنهم نجحوا يلهوني
فعلا
ويدوروا فيا
على دليل
جريمة مخفية
أنجبت نوعي
وغيرهم وغيرهم
بيبصوا ويقلبوا
ويفتشوا ويستكشفوا
ويتكلموا كتير
ويستغربوا ويتخضوا أو يستهونوا
الخ الخ
وانا واقفة ساكتة
وباتفرج عليهم
كلهم
إزاي بيبقا شكلهم
وهما ما يعرفونيش
