لَ سعيد عقل
وجَّكْ:
عَم يْرقّ التلجْ صنّينْ
والغيم رايح عَ العرسْ
وقوس القدح:
زرَّينْ وردِه مْفَتَّحينْ
بْجَيبِة فضا تشرينْ
وْتَا يرسمَكْ
هَ النهرْ صاير ريشِة التلوينْ
واللّوح... لِبْساتينْ
وتَا يرسمَكْ
هَ الموتْ أوّل ما غفي عَم يحلَمَكْ
وجَّك عم يْقولو الجبال العاليينْ:
إيدَيك رهبان الحنينْ
بيشَعّلو العتمِه تا نتدَفّى بقدّاس السنينْ
وْشي باب مبخرتَك ضوي شِفنا سَوا
بخّور لِغْطَيطَه افْتَكَرْنا وْلاد بَيضَا مْعَيَّدينْ
وْوَحدي أنا الندر الحزينْ
والغيم رايح عَ العرسْ:
لَوْلاك ضلّينا خرسْ
لَوْلاك ما داق الهوا رقص الترسْ
وْلا خَبَّرو بْيوت الشِعرْ جايينْ
* * *
وجَّك: عم يرقّ الزهرْ
نوّار مريم بالحقولْ
وْتِضوي تريّات الفصولْ!
وْمشغول عمرَكْ بالشعر؟!
مشغولْ!
من فَردْ دمعَه مارقَه
بالزاويِه تَوْب العمرْ مَبلولْ
وْمن فرد جرح الناي بيفَتِّحْ شبابيكو
وبيسافِرْ عَ طولْ!
* * *
بين الشتي والمَيّ في لَمْعَه
بين الصدى والصوت حَطّ الوقت عَ خْيال الدني دمعَه
طولا سبعْ تِيّام بِالجِمعَه
ومن قبل ما يوصَل عَ الكْنيسِه الندرْ
بْيوقف يضوّيلو البكي شمعَه
* * *
إيدَكْ: متل زَيْبَقْ ندي
بْيهدى على سْطور الوردْ
بَكّيرْ
وسطور البيوتْ
لَوْلاك ما تْغَطّى بالحْكايِه بحر بيروتْ
وْلا الشمس فوق الموج شفتو مْعَلَّقَه لِغيابْ
ساعَه مْطَرَّزَه بْياقوتْ
وْلا وقفت الكلمِه عَ باب المحبرَه
تْشمّ الشِعر وتفوتْ
كنّا عم نْعدّ البحور الطايفِه بالحزن
عدَّينا السكوتْ
أحلى مَ يبقى بين دقّات البكي والمقبرَه مفلوتْ
* * *
تاجَكْ قَصيدَكْ صَوْلَجانَكْ عَصرْ
نْهار واحد هَ العمرْ
يا رَيت ما صار العَصرْ
