لَ أنسي الحاج
1
طْلعْنا تا يتهَدّى بِإيدَيْك العمرْ
مين اللّي نَزّلنا؟!
فْتحْنا البحر غابةْ شجرْ موج
وْإلو دايرْ نقاقيط الحمرْ،
مينْ اللّي قفّلْنا؟!
ما في وَلا عصفور مقدافو ندي
بْزورقْ سَنابلْنا...
عْتقْنا بِبركةْ هـَ البكي لْ إسْما الدني
وْما كانْ يمرقْ حلمْ
بِجْناحو يغَسّلنا!
وْما عاد صوب خْيالنا،
شي نْهار حَوّلنا...
تْركْنا القلمْ عَ السطرْ وِهْشلْنا!
صقْعَه الوقتْ
صقْعَه الشّعرْ،
صقْعه الأرضْ
صقْعَه الحبرْ
صقْعَه العمرْ.
وْعَ بْساط غيمةْ دمعْ
سافَرْنا وْطوَّلْنا...
وْما في وَلا مَطرحْ بيسألنا !
مشْ همّ لولا الشعرْ زعّلْنا...
البيهمّني:
يمرقْ حدا يْولّعْ جمرْ
أخضرْ يشعّلْنا!
* * *
2
بِذكرْ في مرّهْ بالمسا خبّرتني:
حْكايهْ إلا مفتاح ناي العيْنْ،
وْإنتي وْعمْ تحكي: شفتْ نايَيْنْ
مسافرين بْهالصدى
وْبيناتهنْ ما عْرفتْ
حالي وينْ!
بِذكرْ في مرّهْ بالشتي خبّرتني:
إنّو العمرْ ضيعهْ في إلها بيوتْ مهجورهْ،
وْصرتْ ترسملي على قْماش الحكي خْيام البدو،
طالعْ عشبْ ع غْيابهنْ صورهْ،
وْإيدَيْكْ عا لوح الوقتْ
تْزيِّحْ كأنّا جناحْ طبشورهْ !
وْخبّرتني حكايةْ مدينهْ
شَعرْها زينهْ
دقّتْ بِصوْتكْ كاسها،
بَيْضا كأنّو في حَمام بْراسها...
وْسرّها ياقوتْ،
وِجْناحها رَفّ النسيم
وْريحتا لبيوتْ
وْإنتي وْعمْ تحكي إجتْ بيروتْ.
بْإيدا البحرْ،
وجّو على هْبوب البكي مفتوتْ
وْوَجَّكْ بِمَسْبحةْ السما منحوتْ
وْتطليعتكْ متل الحلمْ
أوّلْ مَ بِيبلّش يْفوتْ
يْضوّي الكنيسهْ سْكوتْ...
* * *
3
وِسألتني: "مِنْ وينْ بِتجيب الضبابهْ فيكْ؟"
تلعَبْ معَكْ بالجردْ
إنتي والبردْ
وِتْنوّس شْبابيكْ؟!
"وْمنْ وينْ هـَ اللّيل الحلو المكسورْ بِعْيونَكْ إنتْ!؟"
بِتْلمّعو... وْمكسورْ
بِتوجّعو... وْمهجورْ
بِتْجمّعو... وْمكرورْ.
أْهوَنْ عَليّي يِسحَبو مْن العين خَيط النورْ،
وْلا يسحَبو خيط الهوا
بيوقّعو العصفورْ !!
وسألتني: "بتحبّ؟!
شايفْ تحتْ عيْنَكْ في مَرا"
وقّعَتني مْن المحبرهْ !!
* * *
4
مبارحْ عشيّهْ سْهرتْ... سَهَّرتَكْ،
وْلمّا فْلشتْ غيمةْ هـَ الحْكايهْ
قلتْ: جايي
نوّستْ تحت اللّيلْ وِنْطرتَكْ!
