حاجات - محمد كشيك
-----------------------
حاجات كتيره في بستاني
يموت شجر يطلع تاني
قالت لي في الكوخ الأخضر
والخد أحمر بوس ..تاني
وفي الخميله جميلة...القد
علي قد - حضني وحاضناني
سهرت ويّا النخل نديم
أنا الجديد من كم قديم
انا القديم ومانيش بالي
لكن فرحت وراق بالي
والحزن سال من غربالي
لما لقيت في استقبالي
خدود كتيره في عطفة ورد
وبسمه بتسـلّم علي خد
وحاره بتقول عقبــالي
شربت من حنفيه وزيـر
تفجّـرت قنواتي عصير
من التراب التحتاني
الأرض بالفاس فاحتاني
ركبت وانا فلاح محرات
وعمت عريان في القنايات
أنا اتولدت في إيدي نايـــات
وغنوه علي طرف لساني
حسّيت وكانت حاسّــاني
فتحت عيني بعرض الليــل
عملت في المعمل تحاليل
في الدم طلعت زغروطه
وحاره شايله قفص قوطه
ومكتبه بتبيع كشــــاكيل
وبيت بتربيعه وترتر
بنت بملايه وخلاخيــــــل
بتقول يا:ســـــم ومبسوطه !
ونخله داخله في مجري النيـــــل
وبلحه بتقول ..حيــّاني
ولما واحد حيـــّاني
أخدت م الشربات شفطه
وطلعت ع الســّـلم يافطه
في قلب دكان فكهاني
علي برتقان حلومنـــّور
جماله في النور ألهاني
قعدت ع الأرض اتفرج
علي القمر لمّــا أتاني
داانا اللّي كنت زمان أعرج
بقيت أسابق في حصاني
ندرت ندرن علي روحــي
علي اللي قال لي وأوصاني
وحط بلبل علي دوحي
وعصفورين علي أغصاني
ولمّــا جيت أكتب تاني
الجهل بالحكمه لواني
رميت دوايتي وألواني
وقلت أرسم في خيالي
صور كتير من صور...الحق
ما جاتشي ولا كلمه في بالي
غير إن آه ..أوحش من لأ
