هموم الدنيا حوالينا
بتدفعني
أكون تعبان
أكون مهموم
أكون شايل على كتافي
هموم بالكوم
وبضرب كفّي على كفّي
من الحاصل مع اخواتنا
يـــــا ناس نايمين
لإمتى نكون عبيد سلطة
بتقتل كل أحلامنا
وأبسطها
نعيش أحرار
نكون ثوّار كما قالوا
نثور فــ الحق
لجل الفساد يخلص
نثور لجل البلاد تنضف
نثور طبعاً
عشان كرامتنا ما تتهانش
نثور طبعاً
عشان دم الشهيد ما يروحش
عشان عرض البنات ما يضعش
نثور ومعانا رب الكون
ومن غير الإله طبعاً
أكيد ما نخافش
نثور ع الظلم وديوله
نثور للحق ولنوره
نبدّل ضلمة القهر اللي وارثينه
بقالنا عقود
بشمس الثورة وبنورها
هترجع تاني كرامتنا
أكيد هنعيش بحرية
نشوف حق الشهيد يرجع
نشوف فيهم قصاص عادل
وحكم الربّ يتنزّل
فـــــ كل نظامهم الفاسد
وشمس الثورة هتفتّح
وهبقى ساعتها متفائل
ومش خايف
برغم تعامل البعد مع الموقف
لكن برضه ما هنخافشي
وهنكمل فــ ثورتنا
ولو هنموت
أكيد روحنا
هتبقى قنابل الثورة
عروش المُلك ورموزه
وهندوسه بأقامنا
عشان ياما كتير ياخلق
أهملناه
فـأهملنا
وضيّعنا
وشردنا
وبهدلنا
وعرّانا
وقّتلنا
وعمّلِِنا
وبلطجنا
وصيّعنا
وخلّاكوا
كرهتوا الثورة وشبابها
كرهتوا بلدكوا وترابها
كرهتوا حتى قول الحق
سرقوا حلاوة الفرحة
بغباوتهم
وعرّوا بناتكو فــ الشارع
فــ عزّ الضُهر
بأطماعهم وأحقادهم
ولا واحد رفع صوته
فــ وش الظلم واتجرّأ
وقال كده لأ
رضيتوا بحزب كنبتكم
رضيتوا كمان بسرقتكم
تعبتونا
ظلمتوا
خنقتونا
فسيبونا
نجيب حق اللي ماتوا زمان
ولسه برضه بيموتوا
عشان حضراتكوا تتهنّوا
تسبّونا
تهاجمونا
تقولوا
قلّة مندسّة
تقولوا
كلنا خسّة
تقولوا علينا بنخرّب
قولوا مهما هتقولوا
ولا لحظة فــ يوم نتهزّ
وبرضه تملّي راح نكتر
ونملى الأرض زي الرز
عشان نُسقط نظام الظلم
ـــــــــــــــــــــــــــــــــــ
