فرشة بتنقط سنين.شعر سعدنى السلامونى
الى صلاح عنانى طبعا
فرشة بتنقط سنين
فنان تشكيلى عجوز
فى ايديه فرشة وعكاز
وفرشته معكساه
..........................
كل ما يجى يرسم ورداية
ترسم شوارع وبيوت
اطفال عواجيز
عمارات من قزاز
ناس
بتجرى من البرواز للبرواز
رصاص راشق فى صدر يمام
صرخ
ودخل جوة اللوحة ينام
......................................
رسمت شمس على يمينه
وقمر مرعوب
سما
مصلوبة على دبان
ناس بكرفتات
مدارس وشوارع
رصاصات
اتوبيس مزحوم جدا
عروسين مرعوبين من بعض
ايقاعات
طلعة من صوابع على طبلة ماهيش موجودة
جيوش
بتستخبى فى كوبايات
عيال
واقفين قدام الحياه
تلات ديانات واله
ملايكة بتتسرسب من البرواز
بنت
ساندة كتاب على صدرها وغرقانة فى غرام
صرخ
ودخل جوة اللوحة ينام
...........................................
كل مايجى يرسم ورداية
تطلع كلبش قديم قلبض على ايدين انسان
وكل مايجى يرسم الزمان
تسقط السنين م الفرشة
وتطرطش على رجليه
على وشه
على جفن عنيه
تلبس فى اجسام البنى ادمين
العيال الصغيرين
اللى جوة اللوحة
تكبرهم
وتغرب الايام
صرخ
ودخل جوه اللوحة ينام
..............................................................
كل مايجى يرسم الزمان
تتسرسب السنين م الفرشة
وتملا الشوارع
تزف البشر لحد باب الموت
الكل خرسان
الكل دبان تحت السما
وناس
بتتفجر من كتمان الكلام
صرخ
ودخل جوة اللوحة ينام
................................................
رسمت صواريخ وطيارات
وقانابل نازلة من السما
على روس البلاد
يجروا الولاد
تتدمر البيوت
تتهد المحطات
الارسالات
تضيع فى الجو
المثقفين
ناسين دماعتهم فى البارات
الدم
يملا الشوارع
الورق
راكب على الاقلام
صرخ
ودخل جوه اللوحة ينام
....................................................
رسمت فى الركن الفاضى
سواقى خربانة
غيطان مابتطلعش زرع
اشجار بتطلع على المقلوب
طوب
بينط من الجدران
عكاكيز
نايمة تحت رجول عواجيز
شمس ميتة
نهار هربان
ليل ممدود فى خطوط الغيطان
رش على وش اللوحة الزمان
ونط جواها
جه يطبع ماقدرش
رسم جوه اللوحة
لوحة صغيرة خالص
فيها واحد نايم
عكازة فى حضنه
فرشته معكساه
ومش قادر يسرم
,................................................................................................................................
هذا القصيدة من موسوعة فرشة بتنقط سنين ابع مجلادات شعرية تشكيلية وتم مصادراتها بالهيئة العامة لقصور الثقافة منذ عشر سنوات ولم يخرج الى انور حتى هذه الثانية
