شيماء الصباغ .. عيد الثورة
شيلوا الشريطة السودا م المشهد
خلوا الولاد أسعد
و ابدأوا الحفلة
لبنتنا الطفلة
فى عامها الرابع
اطفوا الشموع
من غير دموع
و لا فيديوهات بتتابع
تجمع العشرات بالورد
فى وسط البلد
شيلوا الشريطة السودا م المشهد
خلوا الولاد أسعد
وديتوا فين السما
فين السما الزرقا
ده كل شىء فى الزمن أصبح بعيد.. فجأة
وبكرة مش بكرة اللى فى اﻹمكان
حتى القتيل اللى شايفينه..
مقتول بقى له زمان
وكل ثانية تعدى يبقى الزمن أبعد
شيلوا الشريطة السودا م المشهد
خلوا الولاد أسعد
هو انت عيد الثورة والاّ ذكرى الثورة
والاّ اختلاط الأمل بالغم
والاّ انقطاع الدورة
من غير ما يحصل حمل
والاّ تفاؤل ساذج
والاّ تشاؤم كاذب
والاّ ما بعد الصدمة
بييجى الكرب
والاّ شيماء الشهيدة
فى طلعت حرب
والاّ الدموع البعيدة
بعيدة
بعيدة أوي
لا تستطيع الانتصار
ولا الانهزام
ولا دخول المعركة
حتى البكا.. بقى أمر مستبعد
شيلوا الشريطة السودا م المشهد
خلوا الولاد أسعد
أنا مش كلام انا مش كلام أنا شعر
أنا نغم بالابتسام وبالألم بيشع
اللى كتبنى ورسمنى للقمر تابع
كل القصايد بنات مقتولة في الشارع
واحنا بنجري حفاه بين الحياه والموت
كل القصايد دماء قبل اما تصبح صوت
كل القصايد دماء
شيماء
شهيدة رافعة الراس
يا خيبة القاتل ويا غباوة الرصاص
شيماء بتحيي الثورة ورايحة تستشهد
شيلوا الشريطة السودا م المشهد
خلوا الشهيد أسعد
