" عزفٌ رومانتيكيٌ منفرد 3 لـ عازف البيانو ... قبل السينفونية رقم 20 "
-----------------------------------------------------------------------
- تانجو .. بين العازف والمرأةُ التي تحملُ في يديها البامفلت -
-----------------------------------------------------------
هاتى بوسه يابت
وكبَّرى خط عنيكى شوية
علشان يكتب فـ عنيا
واعرف اقرا النوتة من النُّص
سلامة عيونك يا حرَّاني
يابت بقولك إستنى شوية
هطلع فوق السطر اتشعبط
واكشف عن كل التاريخ المكتوب بالحبر السِّرِّي
والجغرافيا العريانة
إيه ياحرَّاني
سيييييب إيدي
مين قالك انا جاية معاك
مين قالك انا بهواك
هوا عشان يعنى عينى بتغرق ف عنيك
ولا عشان وسطى بيستسلم ل إيديك
ولا عشان لما بتعزف كل الدنيا بتتحرك ترقص حواليك ؟!!
سيبني بترتيبي وملكش علاقة بكل ملامحي وقول كمان
الغبى فاكر ان البت اما بيستسلم خصرها لـ إيديه
اه
وتسيبه يشيلها وتسيب جسمها ف عنيه
معاك
لالالا مش عاوزِك تبقي معايا
امشى يابت شوية
طيب قول الغبي فاكر ايه ؟
فاكر انه هيدخل كل الحلم
بس اما بيدخل مش بيلاقى الروح
بيلاقى الجسم المفتوح
والصبح بيتقفل الجسم
ويدور ف عنيه
مش بيلاقى الصورة
ولا الوسط اللى استسلم ل إيديه
امال فين الروح ؟
ماكانتش الروح وياه
ياغبى
علشان تدخل أو تلمس كل شفايفى
لازم تدخل من حتة بتفتح فيَّا النور
واما الدور يخلص لازم من تاني تبدأ دور
لازم تعرف تغرق فيا
واغرق فيك
واما تنادى
أكون فـ اللحظة كمان بناديك
وتعدى بحور لـ جبال حرف الـ كاف
حتى لو المسافة بينى وبينك بس لِحاف
ياااااااااااااه
يخرب عقلك
كمل انا معاك
بقولك مش عاوزك تبقي معايا
انا ماشي فـ سكة حرب
وشايل كل غُنايا
وبحارب بصوابعي الإنس
والجن
وبحارب كل ملايكة روحي الراكبة على حصان الطاعة
بس يامجنون .. ازاي بالسرعة دي بتدخل جوايا
والقاني في حضنَك باصه في 1000 مرايه
طب قول هيا بتقوله إيه ؟
بتقوله فـ كل مرة تقرب فيها
لازم احس انها
وكإنها
أول مرة
فى سمايا بتلمس أراضيها
ياغبى
علشان تدخل جوا الروح
إوعاك بالسر تبوح
غير ليَّا
سيب بقا ايديا
وبطَّل عزف على شفايفي السِّتَّة
وادخل بالراااااااااااحة
جوَّا عينيا
