كشف حساب
ميسرة صلاح الدين
هى السما
برضه
لونها أزرق؟
ولا انا
متهيألى؟
مش معقول
مَر الوقت
دا كله
ومفيش
حاجة
اتغيرت
مش معقول
مر الوقت
دا كله
من غير
ما ادخَّن سيجارة
ولا اشرب قهوة
ولا ألمس ستات
ولسة الشوارع
اللى جوة دماغى
على هيئة
سمبوكسات
ولسة الناس
اللى جوة الشوارع
اللى جوة دماغى
على هيئة
دواير
مفرغة
معقول أنا
بكل السلطة
الممنوحالى
على دنيتى
الصغيرة
مقدرتش
أحقق
إنجاز بسيط
زى كدة؟
أنا شكلى كدة
اتخدعت
البضاعة دى
مش لازمانى
يعنى إيه
لاترد ولا تستبدل؟
يعنى إيه
كل حاجة حتفضل زى ما هى؟
يعنى إيه
لو مش عاجبك
أشرب م البحر؟
ما البحر برضه أزرق!!
حرام عليك بقى
أفتحلى الباب شوية
وأنا حاعمل نفسى
ان انا خارج
