أنا مش مضطر على التعظيم ولا ع التألِيه
الموت ما بيقتلش الأرواح
....................... بس الخوف بيذل المعاتيه
الغابه قانون
ميمون ما يصحّش يصبح فيل
............ والسبع ما ينزلش لميمون
والهدهد لو صار شامبليون
يبقى المضمون غير المضمون
....................... والدون بكره يدلدل رجليه
انا مش مضطر على الغابه
............. ولا ع القوانين الكدّابه
................... ولا ذل كلاب البوابه
.................. ولا صوت الست الندّابه
...................... ولا "بقرة حاحا" الحلابه
........................ ولا دون ولا أفيال وديابه
.......................... ولا سبْع بناب لازمُه نيابه
......................... السبع إن مات مين هيغطيه
والديب لو عَمّر واتنمّر
........................ مين هيسمّي عليه ويسمّيه؟
وأنا مش مضطر على التعظيم ولا ع التفخيم
......................................... ولا ع التأليه
الساعه خلاص خامسه صباحًا
............................ جرس التنبيه
الواحد بادئ يتحرّك
................ علشان يتقابل مع عالم
.......................... ربّنا قادر ياخده يا يهديه
طالع مش مرغم ع التعظيم ولا ع التفخيم
......................................... ولا ع التأليه
لكن مضطر إني أستأسد
............ وأصرخ للديب اللي ف وشّي
..................................... وأخزّق له عنيه
مضطر إنّي أضحك للعالم
..................... وأنا مش عارف باضحك على إيه
