أشهّدْ... كل خلق الله ... علي خِلّي .... وأفعاله
أنا عن روحي متخلّي ... وهو مغلّي ... فـ وصاله
وأنا ويّاه كما ضلّي ... وهو تملّي ... فـ رحاله
يا قبلة قلب بيصلّي ... صلاتي روح ورايحاله
أنا لو قلت فـ خِصاله
هاقول الليل ومواله
وأقول الخيل وخيّاله
وأقول الويل وأهواله
وأقول الخطر ... واقول المطر ... وأقول الشجر ... وأقول الحجر صوان
وكل معني خطر ... علي بشر... أو ... جان
وكل حرف إتسطر ... علي كل قول ولسان
لغات الدنيا متكفيّش
بأحس بتوهة الدرويش
فـ أغمّض عيني ... وأسرح فيك
حمام أحلام ... وطاير ليك
لكنْ السكة متوديش
وشال الحلم ميغطيش ... البرد فـ جبيني
يبان البعد فـ سنيني ... جبل مرفوع
فـ أقوم مفزوع
وأفتّح عيني مش بلاقيك
فأسيب الصمت ينده ليك ... ونفس الصمت بيجاوب
مين قال عليك غايب
يا ميّة فـ قلبها دايب
وفـ حضورك ... بيبقي طعمها سُكّر
ومن غيرك ... بيبقي البحر متعكّر
وحال الدنيا متغيّر ... ما بين الوعد والمقدور
تدور أيام تدورنا ... وأنا ويّاك كما كُنّا ... لا هاجر ولا مهجور
ولا عدّي الفراق بينّا
يكفْيني إللي كان ويّاك ... ولا محتاج لشئ غيرك
إيديك الغصن ... لكن الحزن ... بيشتت جناح طيرك
وأما الحُضن ... فكل الظن ... إن الجنة من خيرك
