أكيد باظ منَّها البَشَاميل
ــــــــــــــــــــــــــــــ
حبيبتي ..
بجد متأسف على التأخير
يادوبك لسه باكتبلِك وحشتيني
لقيت النت راح مقطوع
قفز قلبي من الشباك
يشوف الكابل ف الشارع
لقاه عادي .. مفيش حاجه
و تليفونِك .. أكيد عارفه
مفيش داعي لأي كلام
ماهِش طالبه معايا خناق
و لسه من دقايق بس
كُنتي ف حضني ف الأحلام ..
و على فكره ..
جميل جدا عليكي ( الموف )
فظيع ..
تحفه
وحشتيني
رميت نفسي ف تفاصيلك
و قلت زمانها ف المطبخ بتعمل شاي
زمانها عين على البراد
و عين متعلقه ع الفيس
و محتاجه لعين ﺗﺎﻟﺘﻪ
تكون على ساعة الحائط
و عين رابعه على الساعه اللي ف شمالها
فقلت ياريت بإمكاني
أسلّفها النهارده عيوني
و امّا النت يتوصل
حتبعتهم لي على ( ياهو )
زمانها بتقرا ف قصايدي
و بتقول تلتميت أحييييييه
على ( محتاج سما أبعد )
و واقفه ف السما السابعه عشان بتحبها جداً
و خايفه لوحدها تطلع ( سما تامنه )
زمانها حرقت المكرونه من كُتر القلق ع الضل
أكيد باظ منَّها البشاميل
زمانها بتخترع دعوات
عليّا ساعات .. و ليّا ساعات
زمانها ....
زمانها ....
زمانها ....
هيييييييييييييييييييييييييه أخيرا نت
_ حبيبة قلبي .. وحشاني
