أنا زعلان
و مخاصمِك جداً
و مفيش بينا كلام ع الخاص
و لا ف التليفون
و لا عايزك برساله تصالحي
و لا تبعتي غنوه ل " فيروز "
و لا حتى قصيده ل " درويش "
أنا زعلان فعلاً و اللهِ
و قلتلك امبارح على فكره
خليكي الأيام دي ف ضلي
قلبِك يا حبيبتي اللي فاضل لي
و من ساعة ما قفلنا امبارح و لدلوقتي
مفيش و لا حتى صباح الخير
طب ليه بالشكل دا بتضلِّي
ليه بتخلي ..
الحواديت البِكر تعَجز
و تكشر و الدنيا تبوَّز
و انا و انتِ بالعافيه امبارح
لازقين الضحكه ف شفايفها
أنا زعلان منِّك و اللهِ
بس بحبك
باعشق شكل النور ف عينيكي
باعشق لياليكي و حواديتِك
يخرب بيتِك
بيت الحب و بيت أيامه السودا
يا بت تعبت
و كل ما اقول مش راجع تاني
خلاص مش حاقدر
و اكتب ألف قصيده ف موتِك
روحي بتكتب بعث جديد لعيونك فِيَّا
و احبِك أكتر
