خــــــــــــــــرس
البحر
بكل مراكبه وهيشة وطينة
ساكن فى وريدى
من أسوان للمالح
وامبارح
ليه كانت كل عروقى شراقى
كل جروحى سواقى
بتنزح مر
أنا ليه بجتر
الألم اللابد جوه فى قلبى
أنا ليه مضطر
كل ما قابل وشى الصبح
ألاقى ملامحى
ناقصة كتير
مرة الشجرة ومره العصافير
وانهارده
دوارالعمده
وكل الغفر النايمين
يحرسوا لقمة عيشهم
طب إيه يخرسنى
وسكوتك مليان حواديت
ووريدى يبسان
من أخر فيضان اتخبى
فى جيوب الخلق
لو مره مرارة تفارق الحلق
يمكن أتكلم
يمكن أتعلم اصرخ فيا
الصوت متحاش
دى مراكب ود سماعين
غرقانه بكل ما فيها
من ركاب
والصوت متحاش
وجاموسة ود العمدة
بترعى فى أخر
ربع قيراط من أرضى
والصوت متحاش
والقطر الشايل
ثمرة قلبى
يا جه يامجاش
والصوت متحاش
طب ابكى
القدس وغزه ازاى
و أصرخ
بغداد وكابول
ولسانى هنا
خاضع مذلول
ملعون الخرس
اللى مضيعنا
ما بين الناس.
محمود مرعى/الأقصر
