الجهل منبع للقساوة
ولأني جَاهله بالطريقة المنصفة
لتكريم الحياة
لبست جزمة جديدة
مقطعة رجليا من المشي المؤجل
مكسوفة أبص ف قلب بنتي
المسموم بخنجر من غباوتي
يعني البنات السمر لون القمح،
والعيش اللي بنعيش من عجينه
هما معضلة بكرة الجديدة
البنات
قطّعوا الأرحام وبطلوا يوصلوا الأيام ببعض
وبعد ما ركبنا جميعا ف السفينة
اكتشفنا أننا نسينا باقي المخلوقات ع الأرض غرقانة
ومش فاضل عشان نحيا
سِوى أجسادنا ننهش فيها
فقررنا
نجيب ف ولاد عشان نقتات عليهم !!
