أتنفِس ريحة العدم
وادخل لمذبح ضلمتَك
وقدملُه قرابينك
وأطلق سراح الخدم
أسرُهُم هيموتَك
وتحريرهُم كمال دينَك
وأُحجية على جبينك
بلون الدم محفورة
ايها الرب العظيم
هذا الانسان حاول لكنه
مقدرش يكمل الصورة
مالوهش ف لعبة الالوان
ف غصبِن عنُه او بأرادتُه
كان بيبان
ما بين كل الخطوط بهتان
ايها الربُ العظيم
هذا الانسان
قد كَفَر بكل التابوهات
وف بحر نورك ياما خبى
كلام كتير جوا السكات
ودينُه كان بس محبة
وبرغم انه أتربى
على مبدأ العين والسن
تملي كان طبيعته تحن
لكُونُه انسان
وكُونُه كان تملي براح
وعمره ما وجع غيره
عشان يرتاح
مش جاي طالب الجنة
انا جاي طالب السماح
ايها الربُ العظيم
هذا الانسان
ماخَلقَش لنفسه صنم
وأوهم نفسه انه دين
وعُمره ما كان وسط الغنم
بيحركوه شمال ويمين
كلمة أمين
مكنش ليها عنده مكان
غير بس لما بيقتنع
وعشقُه كان فتح البيبان
لما دخولها بيتمنع
فيا ايها الربُ العظيم
هذا الانسان
قد جاء اليك مُتَكِئاً على الرحمة
اسمه فلان
اللي ياما دور عليك وسط الزحمة
فها هي أُحجيتي مكتوبة بالقلم الرصاص
فهل ستكون أدانتي ام أُحجية الخلاص ؟
رامز الجاولي
