طلبنا من الشاعر اسامة عفيفى أن ينشر نموذجا من أشعار عبد الحميد عبد الهادي حسن
ولقد كان يرحمة الله شاعر فصحي مجيد وله بعض القصائد العاميه التي لا تقل جودة عن قصائدة الفصحي وقد أختار منها هذة القصيدة:
قطر بضاعه
الي الصديقين: أسامة عفيفي وسامي كمال
شعر عبد الحميد عبد الهادي حسن
تم تم .. تم تم .. تم تم
سامع... سامع يا جرس
انا ماشى أهه
رغم انى لسه ما لحقتش أريح عجلاتى
.. انا ماشى
تش .. .. تش
باى باى ..باى باى يا محطة
ودا رغم انى بحبك جدا
وبحب ارصفتك واكشاك السيمافور..والمبنى
الجربان.. والناظر
ونباتشى التحويلة
حتى غفيرك دا اللى تملى بيتسربع ويرن الجرس
المدعوق.. .. قبل ما آخد نفسى
باى باى يا محطة
مع انى دايما باتلهف ع الوقت اللى بارتاح على
رصيفك فيه
فانا ماشى ومش زعلان
اصلى خلاص اتعودت ان اللى بحبه
بيسيبنى ..يا اسيبه
انا ماشى ..ماشى ومش زعلان
تتش ..تتش.. تتش
انا قطر بضاعة عجوز تعبان
بازحف على مهلى قوى
انا مش كسلان
ولا افرق عن ايها ديزل ركاب
ولا غير ان الدنيا ادته اربع عربيات
شيك قوى ونضاف وخفاف
ورزتنى انا بحمول ما لهاش اول من اخر
انا يمكن اجمد منه
لكن .. اذا هو معدى انا بتأخر
مرة يزمرلى ويسألنى عن الصحة
ومرات يجرى ويطنش وعينيه بين القضبان
انا مش زعلان
ما انا أصلى اتعودت وباستحمل
وكمان ..قلبى طيب جدا
فلا عمرى خبطت فى قطر زميلى
ولا دستش حد معدى على القضبان
تتش..تتش ..تتش
انا قطر عجو زو مصدى وتعبان
احيانا ..وانا راكن فى محطة ..او فى المخزن
أو على قضبان التحويلة
باتصاحب على قطورات كده زى حالاتى
عواجيز ومصديين
نتكلم ..يحكولى عن احمالهم وهمومهم
واشكيلهم .. من طول عربياتى
اذا واحد منهم هكع اجرة شوية لحد ما ياخد
نفسه
واذا خانى موتورى على السكة بيقطرنى واحد م
الاصحاب ع الورشة
لكن .. وفى كل الاحوال
نقعد مع بعض شوية
ونسلم على بعض ونمشى
بعد ما كون فعلا حبيتهم واتعودت عليهم
المؤلم..انى دايما ما باشوفهمش
واذا صادف مره و لمحت صديق..بيكون دايما
على الخط التانى
اول ما باشوفه جاى على باهدى
"ازيك يا صديقى"
منهم اللى يهدى ويزمر يسألنى عن أحوالى
ومنهم اللى بيعمل زى الديزل ويطنش
أقعد استرجع أيامنا اللى اتعكزنا فيها على بعض
تفر دموع الزيت من عينى وتنزل بين القضبان
تتش ..تتش ..تتش
انا قطر بضاعة عجوز ..تعبان
...... وادينى المرة دى بودع آخر قطرين ف
اصحابى
مش عارف ليه المرة دى حزين اكتر م العادة
ونفسى احود على ايها تحويلة
وافضل اعيط لما ارتاح
يمكن علشان دول آخر قطرين ف اصحابى
واكتر اتنين خزنت معاهم فترة طويلة
أو يمكن علشان حاسس انى خلاص اتهديت
وقريب خالص يمكن ارمى العربيات المليانة دهية
واموت
واذا فكر واحد منهم فى المستقبل
- يعنى اذا فكر
ييجى ويسال عنى ها يتقال له
انى فى يوم هكعت على السكة وما لقتش اصحاب
تقطرنى.. ومت
فاتفكيت
واتبعت حديدة خردة لبتوع الروبابيكيا
توووت
انا هاركن حبة على التحويلة استنى لما تعدوا
بعد ما تمشوا هاكمل
رغم انه ما عادشى على السكة غير الاحزان
توووت
انا قطر بضاعة عجوز ومصدى وتعبان
توووت
انا قطر بضاعة عجوز تعبان
توووت
عبد الحميد عبد الهادي حسن
