قال الكلام ده ثم حطّ الكاس :
الغياب هوّا الغياب..
و الذِكري ف قلوب الصحاب أبقي..
ابقي النهاردة معاكُم..
بُكرة مش هبقي..
و الدنيا سابقة بخطوة كل الناس..
حتي انا..
قفشت نفسي من يومين..
بضحك..
وانتا ما كملتش يا صاحبي ف التُراب..
أول سنة..
وحلمت بعديها بساعة الصالون..
و بإن عقاربها ابتدت تاكلك..
واني براجع مـ الصور شكلك..
حتى هدومك نسيت الريحة..
ما اعرفش خايف اصدق ان انا نسيتك..
ولاّ إني بكره مسيري هاتنسى زيك ؟
