أنا بفضل دايماً للآخر
فى جيمات الكونكان والشايب
و ف كشف الحاضر و الغايب
و ف حجز شقق مصيف بلطيم
أنا آخر تايب في اصحابي
و آخرهم ف الصلاة ف التسليم
و ف دور المدرسة في التطعيم
و في وقت السين
أنا آخر جيم
أنا جرح قديم...كان متغطي
إكمني مشتي...و لابس كم
سبّتني الدنيا بستين أم
وسبتلها ميت ملة و دين
ولحد ماتميت ست سنين
أنا كنت بحب البني آدمين
و كرهت الناس من بعديها
علشان نسّوني أنا اصلاً مين
مش فاكر إمتى حقيقي بدأت
إنما فيه فتره فاكِرها طَشاش
كان فِنجان قهوتي مابيفضاش
و بكلم ربنا طول الوقت
عمري ماصدّقت..بنات غير ريم
و يمكن دلوقتي ما اصدقهاش
أخر مره...
شفتها فيها
كانت تقريبا بتعزّل
و كان فيه سواق تاكسي مِنزّل
فى شنط ناس حتحل مكانها
و وشوش بني آدمين معرفهاش
أنا ريم يمكن كانت قدي
أيامها... لكن دلوقتي أصغر
عارفة إن أنا يومياً بكبر ؟
و بعجّز إكمني مابنساش!
أنا فاكر أيام بالميللي
أنا فاكر أيام بالتفصيل
أنا فاكر يوم دفنة أختي
حتصدقي..؟ أكتر مافاكرها
وساعات بنسي فى ليلة كبيرها
أنا فاكر شقة قصر النيل
ومش فاكر حد من السُكّان
من صُغري و عمري مابنسي مكان
أنا أصلاً فاكر بيت شادي
مع إني مازرتوش غير مرة
بأمارة فيه برواز بره
كان جواه صورته ف إعدادي
كان لسه ساعتها طالعله شنب
ونا حاسس إني طلعلي أتب
من تُقل الشيله و م التفكير
معلش أنا آسف برغي كتير
و بسّف ف وقتك و ف وقتي
أنا حاسس بدماغي بتتقل
أنا نفسي أنام
أنا عاوز اروّح دلوقتي
متشكر جداً ع الجلسه
حنكمّل إمتى علاج طيب ؟
لازم حنشوف بعض قريّب
أنا ماشي...
سلام
