من ديوان براح الصادر عام 2005
خـــــــــــــالو كمــــــــــــــــــال
شعر/منال الصناديقى
مــــــــــــلـــــــوى
واحنا صغار..
كنا بنسرق م المدى ضحكه اللذيذ
ع الشجر من ضلعنا عصفور يهيص
وهو كان..خالو كمال
بيضمنا ويحطنا جواه صحاب
كان يسلط الهوا ينكش ف حس شعرنا
ونندهه فيعملوا فيونكة صفا على كتفنا
وف الأسانسير البعيد
كانت كفوفنا جوا ايديه فى الشيكولاته بيسبحوا
كانت عينيه بالدفا يتمرجحوا
وينططونا..عفرته
كنا نحب الشقلبه فى قعدته
وحكايته لينا شويه ع السفر الحياه
والأراجوز العجيب أبو ضفاير من رخام
واللى عصايته مشخلله شراشيب نوى
ويقول كده..ويعيد لنا
واما ينعس مننا نرمح ف حلمه نصحصحه
ونطير نسابق خطوته
فيغنى وشه ضحكه جايه م السما
ويضمنا ويحطنا جواه..صحاب
وحين ما داقت لمسته كتاف الكفن
الخلق فينا اتنطوروا..مسامير ورق
وبقينا نرجع ننسطل
فيهزنا ضحكه اللذيذ
ونعود ف قمة سُكرنا عصافير تهيص
وتلاغى نبضه ف الملبسه أم بندق وأرض الموالد
والتهتهه فى نقل اسمه من حواديت الكبار
وزغزغاته لرجلنا
فنبات نشاز..وينزنق فينا البُكا
لكننا بنفوق قوام على نسايم ضحكته
بتشدنا وتلمنا وتحطنا جوا
البرواز
