مِتت- مظفر النواب
متت وهمومي وسكتّي غطتك يلجنت كل شي
أمس طشيتك على الأيام صم نسيان
وسميتك حزن!
وصيت نفسي من معزتك تنسى اسمك
تترك السبوره سوده مثل امس تمحي لي رسمك
بطلت أتگبگب گبالك مثل خوفة عصافير البيادر
بطلت اوگف اصلي لك مثل كل المناير
بطلوا الجيران يتختلون بشبابيج حجيك
كلسه وجوني بحسدهم
شگگت كل الدفاتر
متت
لكن انت الشناشيل باجر وانت لدرابين باجر
وانت ايامي الحزينه كلها باجر
متت..
طفيت التبرزل
نيميت المطره بعشوش المشمشة
وحــــــــيل جريتك على الأيام
يا سركَي خشب بطلت اراجي
دفنتك بصبخة فرح بالروح وهديت السواجي
الروح روحي وبطلت ولويت اذنها
شرد اگلك يا حزنها
بطليت.. طلسم فكيت سحرك وانتهيت
ما اجذبك انا ناسيك وبجيت
شلون ما اسكت بروحي تلتفت للماضي تبجي
تحط على الحايط حلمنا
هي تبجي وحايط الأيام يبجي
وآنه صافن مثل المحجر على الريح ارتجيت
لا متت انت ولا انا احتييت
لكن الأيام ماتت.. ولك الأيام ماتت
غلطتك يلجنت كل شي وما دريت
غلطتك صلحها بعدك انت كل شي
