مُجَرَّد حاله و اللهِ
ــــــــــــــــــــــ
...........
يا صاحبي تعبت و اللهِ
مجرد حاله و اتكتبت
و شبطت صدفه ف هدومَك
و تفاصيلَك
و بنت معَشَّقَه ف روحَك
فلمست فيك حاجات ياما
بلاش تعملها حدوته
و نَص جديد
و حالة دهشه و حكايه
أنا ..
مش عبقري أصلا
و لا حاسس
بطعم الدهشه ف الصوره
و لا واصل لسمواتها
- ههههههههه
تدوم الضحكه
يا ابن امي اللي معرفهاش
تدوم تفاصيلنا للعالم
يا عالِم إيه هيفضلَّك ؟
و يفضلِّي ؟
و يفضل مننا للكون
جنون روحي ؟
هوس روحَك بشكل كتابتي و دموعها ؟
حيفضل إيه من الشُعرا ؟؟؟
ديوان محطوط على رصيف ف ( النبي دانييل ) ؟
مجاز مدهش ؟
فضايح ماشيه ف الصفحات
عن الحب اللي ما كملشي
و بنت مطلعه روحَك عشان هبله
و مش عارفه عن الشاعر سوى إنُّه
وطن للحب
و الحُضن اللي ما بيوجعش
و كتابتُه عن الأحلام
و طعم الروج ف شفايفها
و رمانها اللي ما بيدبلش
و أغاني
و مزيكا
و ما بتسألش و لا مره
عطالُه الشعر إيه طيب ؟
ونس خايف ؟
فلوس علبة سجايرُه البوكس ؟
مواصلاتُه عشان الشغل ؟
إيجار أوضَه
على سطوح بيت قديم جدا ف عز البرد ؟
حيفضل إيه من الشُعرا ؟
مفيش حاجه
مفيش غير حلم ما اتحققش و ما عشتوش
و حُضن حلمت بيه يااااااااااما
و ما حَضَنتوش
