ما هو دا العادي
ـــــــــــــــــــــ
سامعِك جدا
و احنا بنتكلم ع الخاص
سامع تنهيدتِك أحياناً
لما تبُصي لسابع سما و تقولي يارب
لما تعاتبي ملايكه معديين قدامِك صُدفه
و بيضحكوا ف السر علينا
- إسكتوا حبه الله يخليكم
حيفَكرني أنا و يتجنن و يزعقلي
مش شايفينُه ازاي مخنوق ؟
مش شايفين روحه المكسوره ؟
مش شايفين ف عيونه شوارع خرسا و عتمه ؟
و مفيش أي عمود ف السكه
راضي يحن بلمبة جاز
شايفِك فعلا
شايفِك بتدَوَّري ف الصفحه
على اللايكات و الكومينتات
و معبيه ف شنطة إيدِك
حبة خوف و أسامي بنات
- مين يا حبيبي ؟؟
ضفتها إمتى ؟؟
كلمتها طيب ع الخاص ؟
يخرب بيت أم المتاهات
كل دا طبعا
علشان ما اسألكيش على حاجه
و لا اسيب الحواديت عطشانه لعتبة بابِك
و لشَهَقَان الليل و طراوتُه
و لا اعاتبِك تاني على غيابِك
أُم عذابِك
حاضر مش حسأل على حاجه
ما هو دا العادي
- يا بني بحبَكـ
- و انا و اللهِ بحبِكـ جدا
أيوه ابتسمي
حافظ صم ملامح وشِك
أول ما بقول الكِلْمَادي
