إنتا تِعَيَّط جَمَل .. !
إزاي ؟
ده الجَمَل حمَّال ،
دمع الجَمل مايتقلش بمال
عمرك رأيته بكى !
طالت و قصرت ، مش مهم المسافة .. المهم الصبر
شرع الجمل فى الحياة .. الإحتمال ..
ذو الخف يتعافى ،
ذو الصمت حتى اشتكى ،
نزلت دموعه النهر !
أعجب عجب فـ التاريخ
يبكي الجَمَل م المشال
أعجب من المريخ
دار البشر فى الخيال
لا وعيت على أيام .. يبكي جمل فيها
و يقول : حُمول تُقال ، يا رحلة .. خفيها
حتى أزيد الزوادة كاس .. يِرُوق البال
كاس .. يِنَسِّي السخافة ،
كاس .. يبل العمر .
،
أحكي :
راح الجمل يشتري م المدى بـ جنيه
قال المدى للردى صُبّلُه يكَفِّيه
قام الجمل شال و راح مع " الراكب "
ركب الجمل مؤمن بـ رب الكواكب /
موسى : من الفرعون لأول مَدْيَن
عيسى : من المهد حتى الإله ..
لابد يرحم ؛ لو ما حبش يحزن
لو كان لـ " ذي الخُف " أرضه وسماه .
إذاً ..
نخاف م العجب ،
نأمن شرور العجايب
نقول : جمل من دهب ..
يلمع وما يصديش .
طب و العتب و المعايب ؟!
ماتخافش ،
ماتخافيش ؛
جمل بقلب ورئة / مناعة م الأوبئة
هموم تروح بـ الحشيش ..
والنفس مش أمارة ، النفس مأمورة ..
يا ألف واحد خسارة ..
على الميدان والصورة :
آدي الجمل إحتمل
وآدي جَمَّال جَمَل .. ما احتملش
آدي الأمل / عَمَل
والعَمَل : ماتنامش
لكن .. وباستغرب : عمرك رأيته بَكى !
يا خلق ،
يا خلق هوووه .. فُكُّوووه ..
حِبُّوه لأنه بـ شعور ..
وبدم فى الشريان
فَكُّوووه ،
وقالوا زَمَن ..
تبكي الجمال الزمان .
هذا إذاً .. ما ترائى !
ما رأى ، أو رأيت ..
النوع : جَمَل .. فى البطاقة
والديانة : نسيت
،
فـ الأُوْلَة : لا دايم إلا وجه رب بشوش ..
والتانية : قلبك ودربك صحاب ما يتعوضوش ..
والتالته : طلعت / نزلت .. فوق وتحت فاشوش ،
جيب بحر من مطروح ..
وورد م الشرقية ،
واسكر بـ عقل يروح ..
وحاجة متنقية ،
واكتب ورايا جُمَل :
جَمَل ..
عَمَل ..
أَمَل ..
مُحتمل
يحتمل ..
إحتمل ..
نزلت دموعه نهر !
واكتب معايا جُمَل :
جَمَل ..
ثَمَل ..
السحابة : طَلَلْ ..
مَثَل ..
عَسَل ..
و الحب من غير مهر .
و أبدأ كلامي بالصلاة ع الـ " سلام "
وأنهي الكلام بالسلام ع العدالة
كعب القدَم يتجه للأمام
يبلغ مدى الأيام تمام الرسالة :
ما لم تكن رحالة ..
لا تكن ..
لا تكون .
