فاكرة يا مَّه لما كنتى تهدهدينى
وتقوليلى بكرة جىّْ فـ حضنه شمعة
وف ايديه برجين حمام
نامى يلا دا القمر ع السكة نام
طب كبرت شوية يامَّه
وف ضفايرى زرعتى فجرك
لما بكرة كان غيطان
كنتى فاكرة انه اخضر
كنتى فاكرة ان الضفاير مش هتكبر
وان فجر الليل هيطلع
حتى لو من غير آدان
لسه فاكرة حضن ايدك
لما كنتى بتمسكينى
خايفة على قدمى الصغير
م الشوارع والطريق
فات بسرعة العمر يامَّه
واما جيت امشى ف طريقى
وحدى بيكى
تهت من اول خطايا
نفسى ارجع طفلة تانى
بالضفاير والمرايل
والغنا ع الشفة يامَّه
والدموع مالهاش مكان
نفسى اقعد جوا حجرك
وبإيديكى تطبطبى كل الالام
وارجع احلم........
ان فى جدعان بتعشق
وان ليا وحدى عاشق
وحدى ليا يبقى عاشق
وان بكرة ف حضنه شمعه
وف ايديه برجين حمام
وان فجر الليل هيطلع
حتى لو من غير آدان
واحضن الاحلام واناااااااااام
نفسى انام من غير م ادور
ع الدفا تحت الببان
****************
مـى منصور