البقعة الحمرا
ميسرة صلاح الدين
البنت اللى بتشتغل كروشيه
لحد ما قلبها اتكعبل
من كتر التجارب
ومبقتش عارفة تفكُّه
وترجعه لبكــٰرته
زى الأول
...
والولد اللى بيقرقش الزلط
يوماتى
علشان حياته تستمر
مع إن مفيش أى داعي
لاستمرارها
...
ودفتر
كله وشوش
وصوابع بنى آدمين
متعاصة مشاعر
من نوعية
إحنا بنشتري
رجّالة
بس ح تدفع كام؟
...
وملاية عليها البقعة
الحمرا
المستنية
زيارة بكرة الصبح
من باب إثبات الحالة
وتأريخ الأوجاع
..
أربع تفاصيل
كل ما احاول اجمَّعهم
فى قصيدة
أحس ان انا فرّطت
ف طيبة قلبي
ولازم
اخش
النــار
