مائة يوم من الاعتقال
ــــــــــــــــــــــــــــــــ
الحرية ليَـارا ســلاَّم
الجرية لجميع المعتقلات
والمعتقلين
قصيدة العدل
تحيةً لسجينة الرأي والكلمة ( يارَا رفعت سلام)
ــــــــــــــــــــــــــــــــــــــــــــــــــــــــــــــــــــــ
حسن حلمي
يا شمس فوق السجن ... طوَّافة
بكرة الحقيقة تطل... هفهافة
صفصافة ترمي الضِّل... عـ المية
والحق مهما انكسر بكرة يتعافى
يا شمس فوق السجن... بتغنِّي
فاتت سنة , وأنا... لسه مستنِّي
مستني ضيك يدفّي كل أوصــــــالي
والوصل مهما انقطع بكرة يوصلني
يا شمس فوق السجن ... تتشـاقى
يطلع علينا الضهر... نتلاقـى
نلمس خيوط مطلعك... نجــري
مشتاق بيحلم باللقا... مشـتاقة
يا شمس فوق السجن... بتصـلي
ضيّك فِ قلب الظُّلـم... بيمـلّي
حروف عدالتك ع البشر تســـري
إمتى ح أشوف العدل يوصــــلّي
يا شمس فوق السجن على نيلي
ميلي عليَّا بالرضا... ميلي
عيب اختشي تعالي عندنا مرة
اٍرمي بعدلِك بقى ربما يجيلي
يا شمس فوق السجن مع (ماعت)
ياللي عدالتك في البشر شـــاعت
اٍشمعنى ليه عندنا , والظلم مستني
وكلما الحق ع اللسان... ماعت
يا شمس فوق السجن مع يارا
إرمي عليها سلامي بإشارة
قوليلها بكرة الفرج عن قريب ييجي
والظلم مهما انتشى ها يموِّته عاره
