عماد غزالى | مش أنا
اكتشف الشاعر عماد غزالى أنه كتبت قصيدة عامية من حوالي 3 سنين، عندما كان يقلب فى كمبيوتره ، واستغرب من نفسه جدا، ولكن فى النهاية القصيدة هنا للقراءة على كتاب الشعر القصيدة عنوانها ( مش أنا )
مش انا اللي خلقت القلم
ولا الصوابع اللي بتخط الحروف
ولا الدم اللي بيجري ف عروق الصوابع
ولا النظام العصبي اللي بينقل الأوامر
ولا الدماغ اللي بتتحكم ف النظام العصبي.
مش انا اللي اخترعت الصراعات والحروب
ولا أوجدت المكاسب اللي بتحركها
ولا القتل المجاني ف كل وقت
ولا الجوع والفقر والخوف م الاتنين
ولا زرعت الشهوة
أنا مجرد مستقبل لنتايج كلّ ده
مجرد كائن
ساكن ومسكون بالهشاشة.
مش انا اللي وزعت الثروات الطبيعية
بشكل متفاوت ف أركان الأرض
ولا باتحكم ف الاتزان البيئي
ولا ف أيّ حاجة
من تعقيدات الأرض والسما.
مش انا اللي حكمت ع الإنسان
يتوالد بالطريقة دي
لما لا نهاية
ولا صممت جيناته العجيبة
علشان كل واحد، ف أي زمن أو مكان
يشيل جواه ملامح جامع الثمار
وصفات الصياد البري.
مؤكد مش انا اللي خليت آدم
يفضّل الثبات
ولا وجّهت حوّا ، لقبلة التحوّل.
انا واثق إني عابر ف وقت مفيش
وإن عقارب الساعة بالنسبة لي
هتفضل-وطول الوقت- لغز كبير.
أكيد
لو كان ليّا دور فعلا
ها تتلبسني الحيرة
ومش هاعرف منين ابدأ
علشان اغيّر شيء
أي شيء
ف قصة كبيرة ومعقدة
وملهاش أيْ معنى.
مش انا اللي أحكمت الرُّتب
وحددت النِّسَب
وظبطت المزاج العام لكل البشر
على درجة متوترة
بتجمع القبول والرفض
وتمزج الاحتقار بالزهو
وتماهي بين الانحطاط والسمو
وتسرّب الشعور بالقهر
ف لحظة التحرر النهائي.
هوّا فيه بجد
حاجة اسمها التحرر النهائي؟
الموت شبح دامغ، بيسخر بعنف
من فكرة التحرر.
مش انا اللي خلقت الموت
وخليته حلّ من الحلول
أنا مجرد واحد بيستناه
ومش واخد باله
وعلشان يسلّي نفسه
بيلعب شوية
في نِسَب الحياه.
عماد غزالي .....يمكن سنة 2010
