كاسين ليمون
شعر : ميسرة صلاح الدين
التلج كان أحمر
زى ترابيزة مدوره
قاعد عليها اتنين
من بتوع السياسة
بينسلوا الوطن بضوافرهم
وبياكلوا لحمه نى
التلج كان أصفر
زى ترابيزة مربعة
قاعد عليها اثنين
سماسرة
زى ما باعوه
وهو عايش
ح يبعوه وهو ميت
التلج كان أسود
زى ترابيزة مسدسه
قاعد عليها اثنين
عساكر
بعد ما زوغوا م الخدمة
عايزين يزوغوا
من دفع الحساب
التلج كان أغبر
زى ترابيزة محدبة
قاعد عليها اتنين
ميعرفوش فى الدين
بس
لابسين عبايته
ومكفرنا كلنا
التلج كان
التلج كان
لكن الليمون
مرر قوى
