وحدوه ف القطر ولّا المدرسة
وحدووووه
وحدوه في أي حتة مُفلسة
وحدووووه
وحدوه ف الصبح ولّا ف المسا
وحدوووه
وحّدوا الشعب الإله
لا إله إلا هوووووو
وحدوه
وحدوه ف الامتحان
ف الانتخاب
فـ الحضور
فـ الغياب
ف المطر
أو فـ الضباب
لسه قادر فـ العذاب
يبتسم لو يقتلوه
يبدُر الحبات تخضّر
يزرع الشتلات تزهر
يهدموه ويقوم يعمّر
والكلاب بينهشوه
وحدوه
وحّدوه واتوحدوا خلفُه
يا تربيّة طمع
وتربية سياسة
وحدوه يا تربية مصالح
واسمعوا منه الخُلاصة
بس قبل ما تسمعوه
سقطوا تلك القداسة
عن قياداتكو القديمة والجديدة
قدّسوا الشعب اللي عايش ع الحديدة
اللي ميت ع الحديدة
اللي مات تحت الحديدة
واللي شاف مصر الجديدة
مش جديدة
بس كمّل حفر ف الأرض الصعيبة
ما انتظرشي القمح ف ايام الحصيدة
ياللي هنتوا القمح بينكوا ونسيتوه
قّدسوه
وحدوه
وحدوه جوه الميدان
وحدوه ف الميكروباص
وحدوه مخنوق بغاز
ولا مقتول بالرصاص
ولا مشنوق باحتياجه
ولا قِلة رزقه وعيالُه الكُتار
بس زي النيل
عمرُه ما غير مساره للنهار
حتى لو ولعها نار
للنهار نفس المسار
وانتوا من أطماعكو
جيتوا تغيّروه بتدهسوه
وحدوه
وحدوه العامل الفرد الصمد
وحدوه العاشق البنت الولد
وحدوه الزارع الأرض بدماه
وحدوه اللي داس الدولة
لاجل تعيش بلد
ابنه وابوه
تطرح حياه
وحّدوا
هذا الإله
