هَ الطَّقس شو مَكْيود
وبيشبه الصّبيان
بسْ بطَّلو يحبُّو
وبيشبه جبينَك
لمَّا لَ غيرَك ببتسِم
وكفوفَك تضبّو
وبيغار
من ريحةْ اللَّيمون
وضحكِةْ ورَقْ زَيتون
من عيون طفل تعلَّقو بالشَّمسْ
تا تاخدُنْ مشوار
من غنْج لعصافير
كيف بفرَح بتطير
من رزقْ ألله موزّعو بغْمَار
ومن فيقةْ الختيار
واقِف متلْ شتلِةْ حَبَقْ
يصبِّح على رَبُّو
هَ الطَّقس شو مَكْيود
وبيشبهَك وبيشبَهْ الوديان
بَدُّو الدِّني..
كلّ الدِّني بْعبُّو
و بيشبَهْ الصّبيان
بس بطَّلو يحبُّو
0 التعليقات