( مليان بصفر..! )
.
الإسم مصرى
المهنه لسّه..
مش ثابته يعنى!!
بس اللى ثابت إنى مصرى
ويوم ميلادى..
تاريخ مزوّر
عدّلوه لو عرفتم,
غَيَّروه لَجلْ ألحق غيرى فى سِنُّه
واخد من علامى بدرى
وبدرى.. بدرى
أبقى حاجه مشهوره يعنى
ويشوفونى يقولوا مصرى
ماانا إسمى مصرى
والشوارع والزحام ورجّة الأدان
وموائد الرحمن
بيقولوا مصر
والعمل عباده
طب لو مافيش
أبقى ناقص فرض ..؟ّ!
وإيش يكون
وانا فى ديوان الزمن مليان بصفر
وانتى الرصيد
لمّا بيكى حلمت
إنتى الشقا لمّا فيكى وعيت,
ولمّا قالولى إكبر.. كِبرت
وناس تقول كبَّر
كبّروا..
وفاتوا الحبّه جبل
وانا اللى قلبه ماستحملش
وزيّهم ماقدرش
نصبت خيامى
وجوّه كلامى
لاقيتنى باخد بلادى تعيش
انا اللى إتلخبطت فيكى
وانخدعت من قبل ميلادى فيهم
معرفش مين هُمّا
وازّاى خانوكى..,
سكنّى الظن
والجنون بقى عارف طريقى
ماتقوليلى..
ارفعى الحجاب عن عينيكى
وشوفينى لو مرَّه
دى صوره باقيه من ميلادى
ودا شارع فى شاعر..,
ودى خَلق اتلسعت م الغربه فيكى..,
ما تقوليلى
ولاّ يقولولنا..
باقى إيه يامحزّمين الروح !
طالع برّايا أفضفض
غرقت فى مد جروح
وشبعنا فرقه لجل يتلم القوت
وشبعنا موت..
صالب سقف البيوت .
مكانش لازم تسكتى,
ومكانش حق
نحرق فى لفّ الساعات دخان..,
وكل يوم تتبخرى
مع كل نفس انقطع فى التوهان
وكل ليله ننام
مكانش حق
كل المراحل سد
كل حياتك كراسى
يا غربتى مابين كل ضرس وضرس..,
وجزمه بتغزّ فى راسى
مكانش لازم تسكتى
ومكانش حق..
تتغير ثانيه فـ ميلادى
ولا اخد حاجه قبل الأوان بأوان,
طالع برّايا أشوفك
دوَرتْـنى أشباهك
زنقتنى أحلامى..
وطفحت وجودى بين مَلكِك وحرّاسكْ .
