سواسية
محمد إسماعيل
محمد إسماعيل
نعيش ع النيل
نموت ع النيل
عشان النيل بيقسمنا
كده بالطول
ومش بالعرض
فيا نعيش الحياة مع بعض
يا إما نموت سوا مع بعض
صباح الخير يا خال حنا
صباح النور يا عم أحمد
ونزرع وردنا ع النيل
يعطر شوق أماسينا
ونبدر قمحنا ع النيل
تاريخ مينا. . . تاريخ سابق
وع النيل الملاك ينزل
مسرة وحب
للناس اللي فيها الخير
ومريم ستنا الطاهرة
وأم النور
بتسقينا محبتها
فـى كاس بنور
وتصحى مصرنا المحروسة
وتلملم عباية الليل
على صوت الأذان ..ساطع
يا شيخ رفعت
يا صوت النيل
يا ريحة المسك و العنبر
ونرسم شكلنا ع النيل
فيطلع لينا
لون واحد
صباح الخير يا خال حنا
صباح النور يا عم أحمد
ولا غيرك يا مصر
ف قلبنا جنة
ولا غيرنا تلاقى فى ساعات الجد
ويطرح نخلنا العالي
بلح أمهات
وأبريم شهد متكرر
وغنينا يا زغلول
سعدك الطالع
وغنينا بلح زغلول
وقدامنا عدو واحد
وكنا كلنا واحد
مصير.. وصدور
بتتلقى رصاص حاقد
غبي مسعور
يفور الدم في الشارع
نقي مصري
يضمه الشارع المصري
يبوسه ويحضنه
ويشهق
يا شيخ درويش
أنا المصري
يا فاس بتخضر الصحرا
أنا المصري
"يا شمس بتلفح القورة
عرق سيال
في غيط القطن
عافية وخير"
أنا المصري
يا صبر العامل المصري
على المكن اللي بيلف
السنين ع النول
أنا المصري
يا ساقية بتحلب المواويل
ماتسقينا.... سواسية
يا نيل... إحنا سواسية
سواسية في طابور العيش
سواسية في سرير مزحوم
من المرضى
سواسية في قايش جيش
فى نكسة ونصر
سواسية ف مرتب
عمره أقصر من بلاوى الشهر
سواسية..
فى جيش عاطل
بيشرب ع القهاوى القهر
سواسية ف بنوك منهوب
من دود البنوك يا خى
سواسية فى ليل أعمى
بيقتل فى العيون الضى
سواسية فى كيل طافح
وسوس سارح
بياكل فى الضمير الحى
سواسية فى زنقة عيد
عشان البدلة والفستان
وفى الأتوبيس
بنتشعبط على السلم سواسية
وبنوفر سواسية من المصروف
عشان المدرسة الخاصة
وكباية لبن طازة
لأولادنا
سواسية
في ليلة حجز
في المركز
سواسية في سجن القلعة والواحات
سواسية
ف غربة بتحرق الأكباد
سواسية
فـ موت فادح
فـ عبارة
سواسية فـ بيوت وقبور
سواسية فـ خيام إيواء
وحتى مساكن الزلزال
سواسية
بننزف
حلمنا فـ بكرة سواسية
وغول الخصخصة كلنا
سواسية
ونترحم على اللي فات
سواسية
ف لازم نفهم اللعبة
ونعرف علة الملعوب
عشان نفضل سواسية
مفيش غالب ولا مغلوب
صباح الخير يا خال حنا
صباح النور يا عم أحمد
ولا غيرك يا مصر ف قلبنا جنة
ولا غيرنا تلاقى فى ساعات الجد
سوا ع النيل
حياة ... وبيوت
بِيبَانها مفتحة للضيف
مراكب حلمنا ع النيل
بتتهادى فـ نسمة صيف
وع النيل فـ العصاري .. الشاي
يدور يسكر في شجن الناي
ويرقص خيل
وعود كمون
وشجرة توت
و ع النيل
الحياة ... و الموت
وع النيل العيال تكبر
ونقرا الفاتحة...... والجبنوت
وع النيل تسهر الحواديت
وتنده ع القمر... يطلع
بوش بشوش
يشاركنا السهر والليل
يشاركنا الهوى والميل
ويضحك
لما تغلبنا سوا الفوازير
صباح الخير
يا هاجر
والمدد موصول
يا ماريا
يا مصرية
صباح الخير
يا بشرة خير
يا عدرا... يا طاهرة
يا مريم يا أم النور
فـى رحلة..... والوطن آمن
وآمن بيكِ والمولود
سلام يا ستنا ع الروح
وأمنتك أمانة دَين
وأمنتك أمانة دِين
تصلى لنا
وتدعي لنا
عشان نفضل وطن واحد
ونيل واحد
عشان نفضل سواسية
ما فيش غالب و لا مغلوب
صباح الخير يا خال حنا
صباح النور يا عم أحمد
...................................
محمد إسماعيل ...
